劉燕妮喊爆控訴：對手下下打眼鼻

劉燕妮（Rika）、唐紫睿（Hazel）、黎美言（Winkie）及鄧穎芝（Vangie）等，昨日出席ViuTV的MMA真人騷《G-1格鬥會》記者會，開拍以來，不斷傳出參賽者受傷的消息，除了贏得冠軍的Hazel關節受傷外，當中Rika的傷勢最嚴重，有傳比賽期間她遭Winkie狼打至左眼微絲血管爆裂，以及手指韌帶嚴重撕裂導致骨膜發炎。受訪時，問到對Winkie的感覺時，Rika卻支吾以對：「如果比賽時，對手下下打眼同鼻，對我嘅傷害同陰影係好大。」

手指彎曲永久飛蚊

談到其飛蚊症被醫生診斷可能是永久性，Rika即聲淚俱下說：「因為受傷，我有兩部電影拍唔到，對新人嚟講影響好大。」除了視力問題，她又透過電話表示手指活動性也受影響：「手指彎咗，依家好多嘢做唔到、唔拎得重嘢，因為再傷就永久好唔番，真係好影響生活。」而主辦單位早已為八名參賽者買保險，每人的投保金額接近七位數，Rika直言仍在處理索償問題：「保險主力交畀公司搞，基本保障都有，但保險歸保險，都唔可以令我嘅傷好番。」

唐紫睿坦言有人上台前話唔打面，怎料上台後第一拳即「鍋」落塊面。	劉燕妮講到可能患永久飛蚊症，忍不住喊爆，我見猶憐。	劉燕妮被打到雙眼布滿血絲，嘴角和臉龐均瘀青一片。

八女拍攝期間屢傳不和，被指狼死的Winkie更遭Hazel、Rika杯葛，活動上，敢言的Hazel寸爆叫觀眾買定花生睇好戲：「拍完《格》先知原來電視圈真係咁黑暗，個個爭出位。未上台同你講唔會打面，扮晒Friend，點知一上台第一拳就打我塊面，真人騷真係一塊『照妖鏡』。」對於Winkie被指犯眾憎，她不諱言跟對方不是朋友，並謂見好友Rika受傷很心痛，為了報仇更打消退賽的念頭：「好多謝佢打到Rika咁傷，提升咗我嘅戰意。」Rika則坦言拍攝期間有不愉快、憤怒和不受尊重的事發生。

眾女星齊齊擺甫士出席宣傳活動。

鄧穎芝即場鎖頸晒技術。

為獎金合約打餐死

提到參賽者均簽下生死狀，高層金廣城坦承投保金額近千萬元，保障範圍包括死亡、永久傷害和失去工作能力：「如果唔簽生死狀，保險公司唔受保，唔係要損害佢哋嘅利益，暫時都未有參賽者索償。」其實眾人打到七勞八傷，皆因勝出者能獲兩萬港元獎金、一份電影合約和金腰帶。據知，新片由杜宇航監製及演出，暫名為《蔡李佛》。

文：影視組