Taylor「色」 揀露霸氣
年度國際音樂盛會《格林美音樂獎》（Grammy Awards）早前在美國洛杉磯舉行，美國天后Taylor Swift除了勇奪三獎外，還於今次《Dress噏》評衫賽果中獲讚着得最靚，成為大贏家！時裝作家Janice Wong讚Taylor性感得來充滿霸氣，配合似足模特兒的身形，天后名銜絕對實至名歸。相反同樣以高衩示人的美國歌手Ciara則性感過龍，失手變暴露兼被Janice狠評：「性感唔係人人可行！」
Taylor Swift 「簡」啱性感
「造型好簡潔，利用Colour Blocking營造搶眼亮點，流行嘅露肩款式襯上清爽短髮，下身配搭幼帶高踭鞋，感覺好利落！佢身形Fit到爆，手腳修長、腰又靚，係Model身形，加上蜜糖膚色撞鮮艷服裝，整體效果好有天后形象，性感得嚟好有霸氣，係一件好難嘅事！」
Lady GaGa 一貫浮誇
「一貫浮誇風格，但明顯比以前收斂咗，對紅色鬆糕鞋款式誇張，係整個造型嘅亮點，放喺第二個身上會好奇怪，只有GaGa一個演繹得好睇！佢着得太正常觀眾會接受唔到，係『人着衫』嘅代表。」
Alessandra Ambrosio 型格冷艷
「好Sexy！束頸設計呼應長裙Cut-out細節，好有時尚型格味道。Smokey Eyes妝容配淡唇色，冷艷而不俗，有剛強感。」
Ciara 感覺暴露
「雖然都係低胸同開衩設計，但佢冇Taylor Swift着得咁靚！開衩剪裁上到盤骨，似半裸嘅感覺，性感唔係人人可行，呢個造型帶出嘅效果唔係性感而係暴露。如果加多啲珠寶首飾，上鏡會出啲。」
Selena Gomez 配合得宜
「典型性感、女神嘅打扮，低胸、露腰晒好身材，條裙亦好閃耀搶眼。佩戴咗耳環唔需要戴頸鏈，戒指可以奢華、誇張啲，整體Matching唔錯。」
Nicole Trunfio 復古味濃
「呢一、兩年興番70年代風格，連身喇叭褲係70年代流行元素，好有70、80年代嘅紐約Studio 54感覺，係當時好多靚人、名人聚腳嘅蒲點，好多設計師都喺Studio 54取靈感。佢着出今年流行70年代味道，好Fashionable，夠晒性感搶眼而唔太暴露，非常型格。」
Profile
王麗儀（Janice Wong），一位時裝作家，是16年前華語媒體中首位遠赴歐美時裝週報道的時裝編輯。她經常為香港及海外的時裝設計比賽擔任評判，連美國CNN旗下亞洲生活時尚網站及香港Yahoo也分別讚譽她為「香港首位真正的時裝權威」及「時裝文化人」。