林峯愛千語BB Chok王有食神

自認廚藝麻麻

可能很多人都不知道，其實林峯與謝霆鋒是師兄弟關係，因為十幾年前兩人跟戴思聰老師學唱歌，不過當時兩位型男沒太多機會接觸。直至兩位男神成為英皇旗下藝人，才發現原來兩人都有很多共同嗜好，除了一樣愛Chok樣外，就是歎美食及打機。

「同霆鋒接觸後同未接觸前，感覺係好唔一樣。當我同霆鋒真正坐低一齊傾偈，原來大家都有kai（傻仔）嘅一面。仲有佢好鍾意落廚煮嘢食，真係有去學喎，而且仲要有天分嗰種。之前有參與霆鋒第二輯嘅《十二道鋒味》，不過我只係負責做切嘢部分，落廚呢方面我唔在行，尤其拿捏分量方面我全無概念，所以為免做地獄廚神，都係乖乖做食客呢。」

霆鋒演藝事業出色，廚藝亦相當了得。	放大圖片	吳千語被男友指入得廚房、出得廳堂，廚藝不比霆鋒差。

「雖然只係參與最後一集演出，但好開心可以同霆鋒了解多咗，但時間所限大家話題都離不開講食，未夠時間講到打機。喺我眼中霆鋒絕對係個成功嘅藝人，由唱歌舞台到電影大銀幕，甚至依家入到廚房都一樣做得好出色。霆鋒畀人好事業型，但畀我感覺就着重生活。有人覺得霆鋒不修邊幅，但每個人生活方式唔同，正如有啲人鍾意食，有啲人鍾意去旅行，我就欣賞佢有好多唔同諗法，就如佢嘅煮食節目全部都係佢構思同統籌，好清楚拍攝上嘅要求。」

林峯經常被拍得與女友到超市買餸，返家一齊煮飯仔。	為免做地獄廚神，林峯自嘲甚少下廚。	林峯坦言不會拍真人騷節目。

讚女友觸覺敏銳

霆鋒是圈中男廚神，林峯女友千語BB為食程度亦可封為食后。林峯自嘲廚藝麻麻，平時拍拖搵食多數由千語負責，更冧爆指在內地拍劇時，因食物太油膩，故前來探班的千語BB會親自下廚。

「BB都好有烹調美食嘅sense，佢能夠睇完幾個唔同嘅菜譜，然後重新整合設計成一道新嘅菜式。好多人都懷疑BB係咪真係入得廚房出得廳堂，但真係唔好話我賣花讚花香，事實BB親手下廚煮過嘅幾道菜式確實好食過餐廳，所以BB同霆鋒嘅廚藝都不相伯仲。佢哋兩個都好謙虛，明白廚藝係無止境，要不斷學習、鑽研先有進步。」

「至於我對食方面都係揀擇嘅人，鍾意周圍去試唔同美食，聽到有好餐廳或小店都會去試試，而多數都係BB推介。有啲餐廳未成為『大眾熱點』前，BB已經帶我去食過，所以佢對美食呢份觸覺是比普通人敏銳。之前有返內地拍劇，內地膳食都比較油膩未必適合自己口味，所以過去幾次拍劇都會帶備大量乾糧食物解決一日三餐，由助手負責煮食。有時BB嚟探班，佢會親自下廚，就算去到較偏遠地方拍戲，佢會搵到當地街市去買材料煲靚湯。」

拒拍內地真人騷

現在內地有很多不同類型的真人騷節目，更以天價酬勞作招徠，邀請名人紅星參與演出。身為萬千少女偶像的林峯私生活當然備受關注，但他無意出賣「生活」，覺得自己無必要將私生活公諸於世。

「有人問我幾時到我參加（內地真人騷節目）？我可以好肯定答大家：『我不會拍。』我係唔會用自己生活一面去搵錢，生活就生活，工作還工作，呢個就係我性格，冇必要全天候廿四小時生活喺鏡頭之下。日常工作已經活喺公眾眼前，仲要出賣自己工作範疇以外嘅時間，實在好難接受。」

筆錄：薄荷　

攝：吳文聰