Kendall開P被圍 火爆動粗
【陳嘉敏巴黎直擊】仍被恐襲陰霾籠罩的巴黎連日來舉行時裝周都加強了保安，現場有配備長槍的軍人巡邏，嚴密檢查每位入場賓客，以免再有悲劇發生；而人氣索模Kendall Jenner完騷後因不滿記者貼身採訪，火爆得想動粗，場面混亂。
巴黎經歷兩次恐襲後，時裝周連日來都加強保安，現場可見不時有數名佗槍軍人手持金屬探測器在會場巡邏，還出動兩部軍用車，凡入場睇騷的賓客都一律要被檢查手袋及出示身份證以供核對。
另外，人氣索模Kendall Jenner上周四晚同索模好友Gigi Hadid行完騷後到夜店出席慶功派對，離開時被大批記者包圍，Kendall因不滿其中一名記者行得太近，一度火遮眼想出拳打人，幸好獲身旁的經理人及保鏢阻止，差點發生肢體衝突，場面混亂。而有指靚仔球星「C朗」基斯坦奴朗拿度（Cristiano Ronaldo）近期向Kendall展開熱烈追求，力邀對方睇自己比賽，再乘機直落約會撐枱腳，不過據知Kendall因為工作太忙未立即答應，但只要她一點頭，C朗就隨時Ready。
宋茜大低V搶風頭
韓國人氣女團f（x）隊長宋茜（Victoria）與少女時代成員Tiffany齊睇騷，Victoria真空大低V上陣，搶盡風頭，她表示今次只會欣賞一場騷，之後便要回去工作；而Tiffany透露是首次欣賞巴黎時裝周，會逗留一星期，看四場騷及拍照，她笑言想把握機會濕平，希望可以盡早來港見粉絲。同場還有內地女星王珞丹、荷里活女星謝茜嘉艾芭及內地名模陳碧舸等，場面熱鬧。
