陳瀅被猷亨笑鵪鶉怕醜面紅
藝人陳瀅與何猷亨拍拖以來感情穩定，有新作播出的她面紅紅透露男友有捧場兼畀意見，更指角色性格與現實不符，對於同劇的蔡思貝被網友劣評聲線高，陳瀅卻認為對方笑聲比說話更高音，感覺有點煩擾，但及後又翻兜指思貝為人活潑。
陳瀅、陳豪、蔡思貝、楊秀惠等昨日出席新劇《潮流教主》宣傳，期間眾人試範春夏季裝束配搭，劇集近日引起不少話題，演員未有受影響繼續瞓身造勢！與何猷亨熱戀中的陳瀅，透露有在網上重溫劇集，亦有留意網友對其角色評論，指不論公司同事或身邊朋友均以古怪形容她，她謂：「佢哋話我戲入面咁鵪鶉，都唔似我本人。」
認蔡思貝幾煩
自言平日有話直說的她，坦言其性格絕不會諗計仔，問到猷亨對其演技有何評價？陳瀅即面都紅晒謂：「咪就係佢講囉！（如果男友話你做得唔好會唔開心？）任何人講都唔會，如果係咁就冇進步！（同男友一齊睇劇？）好熱呀，哈哈！有嘅！」談到思貝被網友指以高聲線演戲，陳瀅笑謂：「已經唔算好高，佢笑聲比較高啫！都幾煩，其實佢幾活潑！（觀眾話罷睇，驚唔驚影響收視？）咁嚴重？等我返去睇吓先。」
陳豪力撐後輩
而思貝則表示不會為網友批評不開心，她謂：「都係善意提點，可以令我改進多啲！（有觀眾話寧願睇亞視都唔睇你！）唔鍾意一定有，咁惟有睇自己鍾意嘅嘢，相信都會有觀眾鍾意！（陳瀅都話煩！）我哋喺片場都係互相煩來煩去，所以拍嗰時好嘈。」至於陳豪就着後輩思貝毋須介懷批評，認為舒服自然最重要。被問到懷孕中的陳茵媺近況，陳豪透露太太將於五月生B，但對今胎是仔是女仍相當口密，笑言要留待太太公布。
文：影視組