甄子丹地獄特訓 同雲狄素鬥肌
甄子丹主演的港片《葉問3》掀起熱潮方興未艾，近日正式在內地上映，短短兩日已錄得3.5億人民幣（約4.16億港元）票房紀錄，教台前幕後振奮不已。子丹不諱言加快步伐「再下一城」，務求將《葉》片的發行推向國際化。近日忙於接拍荷里活巨製的他，更作地獄式操肌特訓，憑一身爆肌與拍檔雲狄素「拗手瓜」。
由於《葉》片近日在內地正式上映，原本忙於拍攝《3X反恐暴族3》的子丹特意向劇組請假，飛往內地「走埠」配合宣傳，先後已到過北京、深圳及廣州等地的他，昨又再現身杭州出席記者會，及連跑4間戲院與粉絲會面，可謂忙個不休，而辛苦背後即傳來好消息，《葉》片開賣短短16小時，票房已錄得過億人民幣，而上畫兩日累計票房更達3.5億人民幣（約4.16億港元），身為男主角的子丹對此成績相當滿意。
籌備續集故事
子丹昨接受長途電話訪問不禁謂：「好開心有咁多觀眾捧場，我成日都話電影拍出嚟一定要觀眾鍾意先得。坦白講，今次《葉》片上映檔期唔係咁好，勢估唔到觀眾要返工、返學都不忘買飛入場支持。我覺得今次咁好成績，應該係《葉問》已累積到一班忠實擁躉，同埋口碑真係好好。（預計內地收幾多票房？）呢樣嘢唔敢講，但照此走勢去睇，過10多億人民幣應該唔難。今日現身杭州，有位60幾歲嘅婆婆，專程坐咗好多粒鐘車嚟支持我，佢話欣賞咗我好多年，令我好感動。」
當問到《葉問4》的籌拍工作，子丹即謂：「一定冇籌拍《葉3》咁耐嘅，遲啲我會捉導演葉偉信同監製黃百鳴坐低傾，我就希望《葉4》嘅發行工作，可以更加國際化，吸納多啲中外粉絲。」據悉，《葉4》暫定明年年中開拍，2018年下半年正式上映，目前故事大綱亦已在研究中。
習慣遊飛機河
另外，子丹因《葉3》的角色造型而減磅，而最近他主演的《3X反恐暴族3》卻要求他爆肌，以配合其特工角色造型。昨日網絡瘋傳一張子丹的「激凸爆肌照」，滿身肌肉的他較身高1米82、與一向以「大隻」見稱的拍檔雲狄素（Vin Diesel ），身形不相伯仲！談到今次地獄式操肌，子丹表示：「好難講晒個過程你聽，總之我每日都要去水、去油同去糞便﹗其實練肌唔係最辛苦，反而《葉3》要刻意清減，就真係辛苦嘞，因為我本身都為食嘛。」
而子丹日內完成《葉3》的內地宣傳工作後，即乘30餘小時飛機轉飛多明尼加，繼續《3X反恐暴族3》的拍攝工作：「近排都習慣咗遊飛機河，我會利用呢啲時間做吓功課，研究劇本同睇戲做溫習囉。」
文：影視組