吳毅將血管撕裂入院搶救

被譽為「騷肌始祖」的男演員吳毅將向來愛運動鍛煉身體,而出身於亞視訓練班的他原定昨早會現身亞視大埔總台拍攝大合照留念,惟他臨時缺席,才爆出他於兩日前因主動脈血管撕裂而入院,其妻唐麗球受訪時坦認丈夫身體狀況出現問題,現已好轉中。

出生於1961年的吳毅將1982年畢業於亞視訓練班,曾參演多套劇集,在90年代轉戰影壇的他更因身材健碩,獲睇中拍攝不少三級片,可謂「騷肌始祖」。吳毅將原定於昨日早上現身大埔亞視總台與大班新舊職員拍大合照,但他臨時甩底,即爆出兩日前他因主動脈血管撕裂入院。

食藥控制情況

吳毅將妻子唐麗球昨日接受本報訪問時表示丈夫出現血管問題,初時情況嚴重,現時已好轉,她亦鬆一口氣:「私家醫院醫生話佢情況嚴重,要立即轉去公立醫院,去到急症室時,仲要幾個醫生一齊睇,好令人擔心!之前佢背脊、胸口見痛,就去做檢查,結果發現血管有問題,好在唔使做手術,因為如果做,都係一個好大嘅手術。依家醫生開藥畀佢食,降低啲血壓、控制住情況先。」受訪時唐麗球正在街市頻撲買餸,準備為老公煲粥,她續說:「老公依家冇乜嘢,今日(昨日)可以食粥。」

醫生觀察數日

雖然唐麗球表示丈夫情況好轉,惟不少好友得知消息後仍感擔心,而唐麗球在昨日傍晚亦前往探望丈夫,更帶了親自煲的粥。據知醫生要求吳毅將繼續留院觀察數日,無大礙便可出院,臥床休息中的他更拍照向大家報平安,又舉拇指又舉V,看來精神奕奕。

吳毅將與前港姐唐麗球愛情長跑十年後在2003年5月結婚,婚後一直相當恩愛。而他在病發前經常更新微博晒近況,近年積極北上發展的他不時出席內地剪綵、商演及代言等活動,密密搵真銀,日前亦晒出多張暢遊鴨綠江斷橋的照片。

文:專案組

採:影視組