栢芝單拖行街囝囝遙控揀衫
藝人張栢芝日前撇下兩個囝囝，獨自往中環行街，她更把BB車當做購物車推住四處穿梭，不一會已買到成車戰利品，期間心繫兒子的栢芝還與大仔Lucas玩視像通話，其後於時裝店睇童裝時，她更給囝囝揸主意再跟囝囝視像「遙控」揀衫。
近年主要北上賺人仔的張栢芝，有時間就會帶住兩個寶貝仔Lucas和Quintus周遊列國四處玩，三母子感情要好。日前下午2時半，戴住黑超的栢芝罕有地撇下兩個囝囝，獨自往中環Shopping，見她推住BB車在商場四處穿梭，不過BB車上並沒有BB，只擺放着栢芝的戰利品。
同男粉絲合照
當日栢芝先往超市掃貨，不一會已購下一些飲品、零食及麵包等，付款後，她把所有戰利品放在BB車上，其後再到附近一間電話專門店，急急找職員詢問，職員亦細心逐一解答，之後她又揀選電話配件，但最終不合心水。而心繫兒子的栢芝，期間突然與8歲大仔Lucas玩視像通話，兩母子傾了足足約10分鐘才捨得收線。
之後栢芝再往平民化的時裝店選購新裝，睇完童裝又睇女裝，期間她一時拿不定主意，索性問囝囝意見，再次視像讓囝囝「遙控」揀衫，未幾已揀下心頭好往排隊付款。離開時有男途人上前要求合照，心情大靚的她任影唔嬲，其後發現有記者，她亦微笑點頭示好，態度友善。
文、攝：追蹤組