張啟樂姜皓文拍MV黃浩然義務客串

藝人張啟樂(Ben)近日為圓歌唱夢,與好友姜皓文(黑仔)合唱首支派台歌曲《巧鬆啲》(好兄弟),二人更找來江美儀、黃浩然等多位圈中好友客串出演MV,但大爆報酬只得一包紙包飲品!兩兄弟相識十多年從未吵架,但因今次合作而發生「小插曲」,黑仔更向兄弟爆粗!

原以歌手身份出道的藝人張啟樂(Ben)近來與好友姜皓文(黑仔)合唱派台歌曲《巧鬆啲》(好兄弟)一圓歌唱夢,為新歌作曲、填詞連監導一手包辦的Ben坦言:「唔講唔知我當初係唱片公司出身,不過一直都未有出碟機會,輾轉之下就入咗電視台,點知一等就等咗十幾年……一開始都聽到好多朋友會話『你幾廿歲人唔好搞啲咁嘅嘢啦!』,但我反而覺得就算你係咩年紀你有你嘅夢想,當有機會、有能力嘅時候就要去做!」

問到為何會找來黑仔合唱,Ben就直指二人非常老友,而且看中黑仔人氣勁有宣傳效果,其後他更大讚對方唱功了得:「搵黑仔起碼宣傳都勁啲,多啲人聽。而且我哋喺舊公司有試過兩次一齊返內地登台唱歌,發現黑仔唱功都好得,一出聲你就會知道佢係姜皓文,依家好多歌手都做唔到呢樣!」而在旁的黑仔亦即笑言:「我以為佢出歌出碟,跟住搵我客串幾句,點知搞到咁大,又派台、做宣傳又唱live,我真係滴晒汗!」

紙包飲品做報酬

從亞視認識至今已超過十年的兩人從未吵架,惟黑仔就大爆早前為歌曲拍MV時發生「小插曲」:「但佢份人成日都好緊張,所以拍MV嗰陣就……(有拗撬?)唔係拗撬,係大聲咗少少咁講咗句『你唔好咁緊張啦!X!』收尾覺得大聲咗,就收番細個聲量拍吓佢,叫佢放鬆啲!」

談起MV,二人更不忘感謝多位幫忙客串的圈中好友們,並直言他們的報酬只得一包紙包飲品:「有江美儀、黃浩然、吳浩康、林韋辰……全部都係義務客串幫手,利是、車錢都無,純粹拍下膊頭講心唔講金,真係得包紙包飲品咋!」Ben其後補充說:「而且因為成本問題,所以MV一鏡到底,佢哋排咗十幾廿次,成兩個幾鐘,都真係唔係幾好意思。」

服裝(黑仔):Take5 & Company

場地:Assaggio trattoria italiana

文:鄧倩兒 

攝:吳文聰