黃浩然衝得太急 腦塞冇新意
黃浩然在無綫新劇擔正做男主角之一，他直言該劇是其病愈後的「復出」之作，並感謝監製等人關注自己健康。他坦言在休息的一年間，反思過去八、九年工作「衝」得太勁，發覺自己可以在演藝事業上做得更好。
去年7月開拍的《警犬巴打》年初二開播，隨即引起熱烈討論，劇情輕鬆大獲好評。有份擔正的黃浩然（Raymond）直言此劇是重出江湖的作品：「舊年7月開工，當時自己已經病好，但未試過捱夜。未試過一日拍十幾場戲，未試過受番壓，未試過咁趕，唔知身體真正狀態係點。好多謝監製同珍姐（曾勵珍）喺我拍呢套劇期間好關注我健康，珍姐成日同監製溝通我身體狀況，會唔會應付唔到。」
堅持食住家飯
Raymond養病期間開始注意飲食，少飲咖啡兼戒煙，身體比以前更好。他謂：「開咗一星期工覺得自己OK冇問題，同埋狀態仲比以前好，因為喺成年休息期入面注重咗飲食，返一日工要三餐都喺出面食，我會有一餐食太太預備畀我嘅飯盒，堅持有一餐係食屋企嘢，自己亦由一日飲幾杯咖啡減少到一杯、最多兩杯，亦都戒咗煙，所以身體其實比以前更加好。」
以前麻木工作
問Raymond接近一整年的休息期如何度過？他坦言過去八、九年工作「衝」得太犀利，無時間吸收新事物，這一年令他獲益很多。他謂：「我去反思以前好麻木咁做嘢，發覺衝得太勁得到嘅結果未必係最好，冇時間充實番自己，冇時間諗吓自己個角色究竟應該點行，可能只係叫食番老本。亦覺得有時太急就畀咗壓力自己，出到嚟會變成反效果，會覺得個腦塞塞哋，冇乜新嘢畀到觀眾睇。拍劇之餘其實亦要着重劇與劇中間嘅休息，可能都會同公司傾番啲時間點配合，睇吓有冇多啲時間做事前準備。當然呢個唔係excuse，只係理想中嘅方向，如果幾部劇一齊搵你，你有咁多機會都一樣要把握，只係希望可以有個緩衝期畀自己吸收新嘢。」
文：陳丹
攝：劉斌
服裝：SFOR、izzue
場地：Tamarind Pan-Asian Restaurant & Bar