文詠珊殺得性起舒淇力撐

藝人文詠珊(Janice Man)憑電影《赤道》中的精湛演出,入圍「第三十五屆香港電影金像獎頒獎」,角逐「最佳女配角」獎項,她表示感到驚喜。對於入圍對手秦海璐、吳浣儀、李心潔和金燕玲全是前輩級演員,她說:「抱住平常心去,冇太大壓力,入圍已經係好大禮物。對於出嚟結果係點都好,有獎當然開心,對大家同自己係一個交代。」

由練功到拍攝弄致遍體鱗傷,JM表示是演員應有的態度:「努力係最基本。今次呢個角色為自己打咗好大支強心針,冇諗過可以說服到自己做一個咁狠辣、冷艷嘅殺手,外界對我有驚喜等於係一個獎,人哋認同我先係最開心。」對於獲好戲之人舒淇透過社交網站留言力讚,JM說:「開心到呢……我係佢一個小粉絲。舒淇係我非常仰慕嘅偶像,一直好鍾意佢嘅演出,得到佢認同已非常幸運,係一個好重要嘅一個鼓勵同祝福。」

感謝舊公司保護

對於有指前經理人公司五年來埋沒了JM的潛質,她說:「最重要自己點諗、點調節心態。快慢唔重要,但唔可以話懶懶閒咁一年等吓又一年,時間唔等人。過去五年喺個家庭係開心,大家都好保護我,只不過可能係個方式或形式唔同。以前係有機會,佢哋可能要求再高啲,可以做到應該要更好、更嚴格,要去到最好先做。當然心態同出發點係為我好,呢方面冇質疑過。」

文:影視組

髮型:Matt Chiu @ Xenter

化妝:Vinci Tsang @ VW Makeup

服裝:Max Mara 、Forevermark

場地:Neighbor Farm Co Working Business Centre