葉麗儀有喜有愁　豁達無憾

殿堂級歌手葉麗儀（Frances）在1969年藉參加歌唱節目而出道，多年來唱過不少膾炙人口的金曲，不知不覺已入行近47年，但Frances仍未有退休的念頭：「冇諗過96年病（乳癌）嗰陣都曾經以為自己會退休，但發覺幾個星期唔唱已經好渴望可以企喺舞台上，到之後10星期左右就有機會上舞台，一聽到《上海灘》嘅前奏，觀眾嘅反應已經令我好感動，令我唔可以放棄，唔捨得嗰種感受。」

無意完全退休
Frances有兒有孫，因兒子一家在澳洲，故她大多時間都在當地居住，做個家庭主婦，享受樸素但充實的生活。問到兒子可有叫她留在澳洲湊孫為樂？她笑言：「佢知我個人性格係坐唔定，知我享受做嘢，所以唔會刻意要求，等我決定，我依家覺得有興趣、有意義先去做。」而講到孫仔曾患腦癌，Frances坦言：「佢一出世五星期就發現腦有腫瘤，初初驚佢一歲養唔大，點知轉眼已經五歲，而且已經冇癌。雖然佢依家發展比較慢，要慢慢教，但佢係好開心嘅小朋友，身體發展都正常，所以覺得佢係天賜畀我哋！」

求主代孭包袱

除了孫仔曾患腦癌，Frances自身亦患過乳癌、又試過因更年期患上抑鬱，對於身邊好像總被不幸事圍繞，問到可覺得是上天給她的考驗？樂觀的她則認為人總有生老病死，無人能一世平安順利，幸好自己有宗教信仰：「每次遇到難題，好多時會同天主講呢個包袱好重，唔該幫我孭咗佢。（對生老病死好豁達？）人始終要死，我癌症之後已經咁諗過，既然唔知自己幾時會發生呢件事，為咩要咁擔心？反而可以選擇好開心積極咁過每一日，用精力盡量保持身體健康，咁病就唔會復發。」現年68歲的Frances已活了大半個世紀，如果要用兩字形容人生，她會用「無憾」：「人生冇咩想做啦，可以講係無憾，有兒有孫，仔又孝順，孫又乖，去邊啲朋友都讚啲孫有禮貌，新抱又係賢妻良母，好開心滿意！」

文：音樂組

攝：秦健輝