蘇麗珊林小美甜到漏 DIY冧情人
情人節將至，又是時候為另一半準備禮物，新紮女神蘇麗珊及林小美亦齊齊整愛心朱古力，實行冧爆男友！兩位女神「講心唔講金」，自言最愛收男友的手作禮物，並大談自己的情人節經歷。
新紮女神蘇麗珊（Cecilia）及林小美（Cherry）趁住情人節，相約一齊整愛心朱古力，為另一半送上驚喜。兩位女神更搞搞新意思，用上香甜草莓配搭sweet爆朱古力，令另一半收到時更「甜到入心」！
問到她們最想收到的情人節禮物，Cecilia及Cherry都直言不愛收昂貴禮物，反而望男友親手整禮物，認為心意無價：「心意係用錢買唔到，所以都鍾意另一半送handmade嘅嘢，自己都會整心意卡同朱古力畀對方，見到佢收到禮物時好驚喜嘅樣，就算事前付出咗好多時間去整禮物，都覺得格外滿足！」
盼浪漫之旅
談到最浪漫的情人節，Cherry冧爆指曾有絕迹廚房的男友與她一起下廚：「最浪漫嘅一次係同另一半一齊煎心形牛扒，雖然最後唔成功，但見到佢唔識煮嘢食，依然特登煮嘅個份心意，令我覺得好感動。」Cecilia卻大呻未有如此浪漫的經歷：「我反而冇咩呢啲咁sweet嘅經歷，可能另一半無咩浪漫細胞，最印象深刻都係孖住朋友食情人節大餐。同埋試過單身，要自己一個孤零零過節日，有啲孤單同埋戚戚然。」兩位女神更期盼與另一半到外地，過一個浪漫的情人節：「其實幻想中嘅情人節係同另一半去歐洲小鎮旅行，喺好靚嘅室外環境下食燭光晚餐，感覺好浪漫。」
文：力奇
攝：司徒國榮
化妝及髮型：Leo Tam，Nat Chan
場地：點Cook Guide