陳婉衡胸猛上位 密謀做業主
新一代「宅男殺手」陳婉衡（Alycia）憑火辣身材彈出，成為「無綫咪神」。去年她更勇闖影壇，連接兩部電影打孖上突破自己，更初嘗演員辛酸，慘於街頭被「潑冷水」！身價幾級跳的Alycia更自信爆棚指猴年將為她的豐收年，並高呼新一年誓要儲到首期做業主！
藝人陳婉衡（Alycia）擁有36Ｅ驕人上圍，不時大方晒身材的她迅即成為新一代「宅男殺手」兼「無綫咪神」，人氣高企！於去年首闖影壇的Alycia，更連接兩部電影打孖上挑戰自己：「第一次拍戲其實覺得幾好玩，但一開頭睇劇本時，見到要演嘅角色同自己好唔同，好驚會做唔到導演要嘅效果，不過好在有前輩Benz哥（許紹雄）帶住我。佢真係好戲到令我好快就當咗佢係我爸爸，平時等埋位時亦學到好多嘢，睇咗好多前輩真人示範。而之後個套就比較嘻嘻哈哈，因為成日都成班女仔一齊，好似平時咁，所以都好自然。呢兩次嘅拍攝經驗都好開心好好玩！」
13度低溫被「潑冷水」
Alycia又大爆於拍攝期間被「潑冷水」，初嘗演員辛酸：「開戲個陣啲時間係幾辛苦，不過我諗最難忘都係有場戲，講我哋做promotion girl，着短裙喺銅鑼灣街頭畀人用水淋，嗰時仲要係冬天得13、4度淋凍水！咪睇roll緊機嗰陣我哋成班女仔係好似好開心咁，其實一cut咗之後，所有工作一員就拎晒薑茶、大褸畀我哋，全城戒備。」
頻頻接job裝備自己
Alycia自順利上位後密密接job，騷價幾級跳，揚言猴年將為豐收年，更高呼新一年誓要做業主：「新年願望當然係想盡快做到業主，雖然上年多咗job做，又接過廣告，算係賺多咗，但同時都買多咗好多嘢裝備自己，應付唔同類型工作，而且都要畀家用，所以要再努力啲，希望猴年愈賺愈多！」問到有否買些禮物獎勵自己時，她則表示：「冇實際買啲咩，反而就去多咗旅行，畀自己一個真正放鬆嘅機會。」
文：專案組
場地：LIFE Restaurant & Bar
攝：劉斌