薛凱琪月使兩萬 求加人工
女星薛凱琪（Fiona）經歷了一個非常忙碌的羊年，唱而優則演的她，賺到盆滿缽滿，被問有否畀錢媽咪過新年，由母親全權負責財政的她真情流露說：「呢三、四年，佢日日過肥年啦！」，每月領取兩萬元生活費的她笑言要去勞工處投訴，認真搞笑！
Fiona自爆新年有假放，她說：「本來想同媽咪去睇北極光，但放得一、兩日假咋，所以同屋企人食飯已經好好。（陪父母去拜年？）我本身都少拜年，冇咁嘅習俗，媽咪連利是都冇畀我啦！（你有畀錢伯母過年？）入行到依家都係直接畀錢媽咪管，佢每月再畀兩萬我使，呢三、四年佢日日過肥年啦，我就嚟去勞工處！你哋幫我叫黃柏高加我人工！（會同房祖名拜年？）我唔知佢喺台灣、北京定香港？如果一班人約埋，我會去，但唔會主動話去，否則會好奇怪。（你有同佢傳福音？）有幫佢祈禱，會經常講神迹，佢未決志信主，但我估佢都快，慢慢嚟。」
祈求身體健康
Fiona又透露身體近排多病痛，她說：「唔知係咪免疫力唔妥，塊面出紅色粒粒，左耳有時有啲撻撻聲，冇時間睇皮膚科，靠化妝遮，我祈禱上帝等我耳仔同皮膚都可以撐住！（祈禱上帝賜恩緣？）唔呃你，結婚、生BB當然有諗過，但呢啲大事情，我相信神一定有安排，若果有適合嘅男仔出現咗，我一定feel到。我覺得如果我有100歲命，就算50歲至結婚，都有50年時間對住，所以唔心急。依家做好國語碟先，時勢咁差都有公司支持我做歌，要好好把握！之前我因為信仰推咗啲鬼戲，（損先幾多位數字？）總之好多，要咬緊牙關！」
文：影視組
攝：鄭家俊
化妝：Jessica Chan @ Jessica Chan Make-up workshop
髮型：Jo Lam @ Queen's Private i
服裝：ISABEL MARANT，Mosca，SHUSHU/TONG
場地：Hotel Icon