朱晨麗低吸未入肉
朱晨麗：「總共買咗六位數字嘅股票，其中有能源股，其實我買嗰時都好低嘅，跌到依家都未入肉，同埋之前升都放咗好多。不過梗係希望唔好冧啦！香港好多市民都有買股票，不過今（昨）日跌市對我冇影響。」
曹永廉：「近幾年都冇乜掂股票，因為之前真係輸得太多，依家咁樣跌法，之後咁上下有嘢值得入咪玩吓囉！但都唔會買多，因為之前實在輸太多。」
林盛斌：「一早開工冇睇股市，呢幾日拜年身邊有專家提點我，開市就要放，依家揸住嗰啲係穩陣藍籌，影響性唔大，好幾年前試過炒股搞到冇咗幾十萬，自此轉買磚頭。（會否趁低吸納？）唔會，反而會提醒屋企人小心啲，因為姨媽、姑姐都有買股票。」
DJ少爺占：「手頭上冇乜（貨），之前要置業，變晒現金，依家股巿咁波動，但冇時間入，冇乜影響，不過我想講啲人好得意，跌就好驚，唔明點解升時候想買，呢個諗法係錯，應該跌嘅時候諗係咪要入，到升嘅時候就要放，如果做得到就係大贏家。」
