方力申喊晒口 蒸發百萬老婆本
昨日大年初四是新春假期後首個交易日，喜氣洋洋氣氛下，恒生指數卻急瀉至18,545點收市，一眾星級股民即時變到「年初四咁嘅樣」！直言「冇眼睇」的歌手方力申（小方）帳面蒸發逾百萬，損失一大筆「老婆本」！而在去年股災帳面蒸發七位數的藝人莊思敏（Jacquelin），今次再蒸發廿萬，拍戲時不禁「爆喊」！
恒生指數昨日急挫742點，收市報18,545點，成為2008年鼠年以來最差的紅盤收市！歌手方力申更蝕入肉，昨日接受本報訪問時大呻帳面蒸發逾百萬：「損失咗七位數，我真係冇眼睇！我直情傷心流淚，但冇辦法，冇人會估到，我惟有繼續努力工作搵錢，暫時唔買股票啦！千祈唔好撈底，唔知個底係點，切忌撈底，等個市好番啲先買！」小方與女友鄧麗欣拍拖十年，惟遲遲未結婚，今次股災恐怕令小方損失大筆「老婆本」，婚期分分鐘要再Delay！
莊思敏借拍戲嚎哭
藝人莊思敏繼去年因股災而帳面蒸發七位數後，今次再蒸發近廿萬，令她拍戲時不禁「爆喊」，Jacquelin昨日接受本報訪問時透露：「我自己持有四隻以上嘅股，帳面蒸發咗廿萬，但唔會放。我持有嘅都係細價炒股，早已中招，所以今朝（昨早）見到個市跌到咁都冇乜反應。今（昨）日咁啱開工拍喊戲，喊完出嚟舒服晒！」
常常與Jacquelin交流投資心得的藝人陳庭欣，昨日受訪時透露：「有五位數股票，今年唔係猴年，係蟹年，由得佢擺吓。我都慣晒喇，我對於後市非常樂觀，由佢擺吓都有息收。我唔會再入貨喇，之前莊思敏同莊思明教路溝貨，趁低吸納，依家都唔會再喺佢哋面前講股票。」
朱慧敏穩陣派收息
而藝人朱慧敏也屬於「穩陣派」，不過今次亦難免有損失，昨日接受本報訪問時說：「我買大藍籌，所以好穩陣，而且我對公司嘅前景好有信心。今次的確都有跌，我帳面上依家都有蝕，但都有息收嘅。」她又相信股市會雨過天青：「前一段日子升咗好多，我都有啲斬獲，股市回一回都好正常，唔會持續咁升。我好樂觀，我相信個市會先跌後升！」而藝人李思欣則透露老公范振鋒今次有蝕五位數：「佢有玩少少，之前股災都已經跌咗啲又入多少少，諗住蝕少啲，點知都係蝕，前前後後五位數左右！」
文：專案組