雷頌德鍾情死物唔會搞三搞四

音樂人雷頌德(Mark)與太太梁家玉前晚夫妻檔出席活動,熱愛電單車的Mark笑言自己似電車男只鍾情死物,故不會到外邊搞三搞四,難怪夫妻倆恩愛爆燈。

音樂人雷頌德(Mark)與太太梁家玉(Jade)前晚出席電單車活動,Mark更有份設計其中一款電單車,夫婦倆同樣是電單車迷,Jade更有13年揸電單車經驗,被笑指是辣妹時,Mark維護太太說:「揸電單車未必係辣妹,係大膽。」Jade笑言:「係喪。」雖然兩人並非因電單車而結緣,但Jade承認當知道大家也愛揸電單車時,有叮一聲的感覺,Mark也認同:「覺得好難得,男人揸電單車已經少,女人就更加少。」

教小朋友安全意識

至於婚後有否禁止太太揸電單車?Mark坦言:「揸電單車係冇問題,識嘅人會知道點樣小心。(將來會唔會畀小朋友揸電單車?)我有諗過,父母對小朋友實有影響,佢哋遲早都想(口架),要教佢哋安全駕駛,我好難阻止佢哋,因為我都揸電單車。」Jade希望盡量延遲小朋友學揸電單車:「希望佢哋思想成熟先學,太細個會想認叻,好危險,有安全意識同錫身就安全。」Mark透露也有為太太設計電單車,他表示:「我向來都鍾意搵啲嘢搞,搞完自己嗰架,搞太太嗰架。」Jade笑謂:「好在佢只係鍾意搞車。」Mark補充說:「好似電車男咁,鍾意死物,就唔會出去搞三搞四。」

方力申邀設計愛巢

至於方力申稱今次專程為撐由Mark設計的電單車,他揚言早具慧眼發掘到對方的設計才華:「我大膽講句,佢設計得咁成功,我係有份發掘佢嘅才華,十年前我嘅唱片封套係由佢做藝術總監,當日去咗佢屋企影相,我話你間屋咁靚,原來係由佢自己設計,之後我爸爸嘅三間舖,我嘅電單車同電單車衫都係搵佢設計,酬勞由送禮物到畀利是到畀錢,依家已經畀唔起。」他笑言他日結婚會邀請Mark為自己設計愛巢代替人情。

文:名人組