王宗堯做Uber司機 唔怕警察放蛇
男神王宗堯昨日參與慈善活動，化身一日星級出租車司機，幸運乘客激讚服務冇得頂，當中三名女乘客獲男神接載甜入心，宗堯更親切送禮及貼頭自拍，令三女High爆！惟提到早前有Uber司機被捕及罪成，宗堯不怕有警員放蛇，並說：「睇吓重案組得唔得閒囉！」
王宗堯昨午化身一日星級司機，為出租車Uber應召等乘客Call車，他先由大埔工業邨出發，身穿西裝的宗堯笑言希望感覺專業整潔，談到早前有Uber司機被捕兼罰款停牌，宗堯似乎未驚過，力撐Uber對司機及乘客均有保障：「Uber係全球性機構，曾經喺另一國家有第三者保險Claim過，如果有咩事，相信佢哋會出面解決。（你了解有定冇？）佢哋有同我提過，相信呢個服務係絕對安全、有保障。」問他怕不怕警察放蛇？宗堯說：「嘩！咁我非常幸運！若果咁做係幾好，又幫到警隊宣傳證明做嘢有效率，咁大單新聞，亦幫到公司，相信我呢個星級司機畀星級警察放蛇，佢哋都會派星級律師幫我打，咁睇吓重案組得唔得閒囉！」
零酬勞不涉金錢
他又澄清並非挑戰法律，但認為社會應接受改變，並自爆坐的士屢遇不快經歷，希望政府放寬條例，讓市民有更多選擇。而Uber發言人表示昨日宗堯是以義務性質參與慈善活動，沒有收取酬勞，與乘客亦不涉及金錢交易，昨日的乘客是網上活動幸運兒，每位幸運兒要捐出68元予香港失明人協進會。Uber發言人又指所有Uber行程均受保險保障，所有Uber司機夥伴包括王宗堯，除持有第三者保險外，若司機夥伴的保險已失效或因任何原因未能兌現，Uber的環球保險亦會提供有關保障。
男客讚要畀六星
昨午宗堯出車後先到沙田等客，惟久久未有Order，他決定到旺角及尖沙咀等人流較旺的地點，途經黃大仙天馬苑附近，男神終於「開齋」獲一名男乘客「召喚」，目的地是尖沙咀廣東道。落車後宗堯送上大會安排好的禮物給乘客，該乘客對宗堯的服務相當滿意並大讚說：「五星都唔夠，要畀六星！佢講咗好多駕駛技術我聽，好正！」其後宗堯再收到Order，在尖沙咀麼地道接載三名女乘客，三女見到司機竟是男神即興奮狂叫，並送上自製炸油角予宗堯，上車前及在油麻地落車後她們均圍實宗堯瘋狂自拍，他亦體貼為三女開車門，令她們冧爆！
充當司機後的宗堯相當高興，對自己的駕駛技術甚有信心，因經常接載父母及模特兒女友Christy（黎紀君）：「最近女友考到車牌，我會陪佢揸車當係補鐘，帶佢去啲靜嘅地方，睇吓佢泊車，都訓練到我耐性。（女友手車點？）佢膽係ok，其他就再練囉！」
文：影視組