呂晶晶拍床戲最緊要靚仔

昨日吳啟華、宣萱、呂晶晶、趙碩之、蘇永康、趙彤等到澳門，出席由鄧特希監製的新劇《隱世者們》記招，陶大宇則因事缺席。見晶晶無懼嚴寒，特意穿上性感透視裝大晒Bra Top，揮低同場打扮密實的趙碩之。成功「凸圍」的她更「搏到盡」腳踏16cm的高跟鞋上陣，卻慘被蘇永康於台上揶揄她行動不便。其後她解釋因過往與同公司模特兒齊齊出活動時，自己似足小矮人，故以超高高跟鞋現身。

等監製定奪

性感示人的晶晶被問於劇中會否演出床戲？她笑言不排除獻出首次床戲，但詳情由監製定奪。她謂：「今日咁着因為場合隆重。（有冇火辣演出？）有感情線，不過未知係邊個，監製未講。（打戲定床戲較難？）床戲唔知有冇，不過都難應付，我始終未拍過。（要求加戲？）要睇吓對手係邊個，靚仔就OK啦！」

宣萱（左起）、蘇永康、鄧特希、駱應鈞及吳啟華一班老拍檔很開心再次聚首合作。	趙彤無懼寒流，穿開衩裙晒美腿。	有料之人趙碩之打扮密實，非常失色。

宣萱嗌減肥

兩位舊拍檔宣萱及吳啟華於台上大放笑彈，宣萱更將啟華及大宇被指不和的傳聞擺上枱：「佢好想嚟，但佢怕咗你。」啟華聞言急急澄清：「合作好開心，我絕對冇介意戲份多少。」未能現身的大宇拍片支持宣傳，更於片中透露與宣萱有床戲，預告會全力以赴、發揮得淋漓盡致，又叫宣萱要做足準備。宣萱受訪時笑言拍床戲駕輕就熟，但要先減肥作準備。

啟華透露於劇中與趙碩之談情，笑言是段純愛關係：「我哋係puppy love。（大宇有床戲，你冇咪蝕底？）拍戲啫。」