家輝百人護駕禁蒲自保

「影帝」張家輝、張繼聰與盧海鵬等日前到牛頭角一座商業大廈為《使徒行者》電影版開工，拍攝一場在會議室開會戲份。雖然只是文戲，但家輝每次停機也會看重播了解演出，十分專業。他表示今次拍得非常順利、舒服，因導演文偉鴻具經驗兼安排得好，動作場面亦已開始拍攝，剛剛便拍攝一場重型槍戰，效果也很可觀。

與阿佘首度合作

講到《使》片將到巴西拍攝外景，家輝透露預定年初四出發，故趁農曆新年假期到長輩屋企拜年：「希望今次去巴西可以拍到一啲香港電影好少見嘅景，預咗要長途跋涉同面對當地嘅治安問題。（太太關詠荷擔唔擔心？）佢好似冇提過呢樣嘢！其實我都唔係太擔心，出去拍戲閒閒哋一百幾廿人一齊，只要自己檢點唔去夜場，去買嘢又一大班人一齊，相信問題唔大。」

張家輝與張繼聰等拍攝開會文戲，專心對戲個個認真。	張家輝與佘詩曼首度合作，期待與這位「視后」交手。	張繼聰透露拍新劇時又要剝衫，新年期間不能大快朵頤。

今次與曾多次拍檔的古天樂再度合作，家輝笑言有晒默契拍得順暢，相反與佘詩曼則是首次合作：「戲裏面同阿佘對手戲唔多，本來有一場但係落雨未拍到。同阿佘可以話第一次合作，喺無綫都未一齊拍劇，不過呢啲係老一派嚟，離開佢先入嚟。」

張繼聰又要剝衫

至於客串演出的張繼聰對繼《陀地驅魔人》後再與張家輝合作，大表興奮：「只係有少少對手戲，同佢少啲戲好，太多戲對住家輝我會標汗。」他笑言若家輝再做導演又用得着自己時，必定即刻舉手報名，又透露農曆新年前會開拍新劇，劇中再次除衫騷肌，故新年時不敢放肆食蘿蔔糕與盆菜，希望只此一場：「為呢場戲我又要過食烚雞、烚菜嘅日子，好似做咗脫星之後，好難洗甩脫星嘅角色咁，陰影揮之不去！」

文：影視組