城城苦難悟空 毛茸茸似針拮

郭富城繼2014年《西遊記之大鬧天宮》中演繹最型仔牛魔王後，今年在星皓有份投資的新片《西遊記之孫悟空三打白骨精》中，變身孫悟空！阿城指是對自己的一次考驗，他說：「化幾個鐘頭妝，但因為要就太陽光，只能夠拍４個鐘，我身上披嘅係荷里活特技組特製嘅肌肉服，穿着好麻煩，冇乜嘢都唔好又除又着，所以我要學識點去平復心態，盡量唔畀自己流汗，但其實拍文戲肌肉服入面已經出汗，何況動作戲？另一樣考驗係平時我唔慣被嘢拮，但肌肉服成件用好似魚絲咁硬嘅線勾晒悟空啲毛，我變咗好似被５千支針拮住嚟演戲，好難忘！」

苦練金剛棒

阿城亦難忘與演白骨精的鞏俐對打，他說：「佢係國際巨星，但冇架子，親自吊威吔３、４層樓咁高，反而我飛住追打佢，我有啲驚！但佢好享受拍打戲，戲好又專業，洪金寶度咗好多好有特色嘅動作畀我哋，每一場、每個角色都有特色，為咗耍金剛棒耍到好熟，我都不斷苦練，觀眾要留意！」

羅仲謙拍戲時要避流汗，以免整溶全身的藍色妝。

羅仲謙藍色妝。

避流汗溶妝

羅仲謙與城城戲中亦是不打不相識，謙仔說：「能夠被阿城打，我覺得好過癮！我戲中都要着肌肉服，同阿城差唔多慘，但拍之前都預咗。我都一樣唔可以流咁多汗，因為我成身藍色，如果流汗走咗色，我又要不停補顏色，好在我流汗都唔多。以往沙僧都可能比較係唔顯眼嘅角色，但今次就重戲咗好多，英雄感重咗，成個演繹感覺都唔同，觀眾會覺得新鮮！」導演鄭保瑞則相信電影中唐僧四師徒情誼，與三打白骨精等《西遊記》經典情節，會讓觀眾看得如癡如醉！

文：影視組

攝：劉智源

場地：Crowne Plaza Hotel Causeway Bay