林莉嫻喪運動Keep葫蘆身形
主演《鴨王2》的林莉嫻（Leslie）最近頻頻出席活動，為新片宣傳造勢，見她每次都以「戰鬥格」現身大騷Quali，與其他女演員爭妍鬥麗，弗爆身材簡直令女士們羨慕妒忌恨！不過，Leslie背後付出的汗水大家卻未必知道，為了減磅她無所不用其極，她笑言：「都係為自己之前喪食負番責任啫！」
林莉嫻（Leslie）接拍電影《鴨王2》，更擔正孭飛做女主角之一，她在片中不乏與男主角親熱的「肉搏」鏡頭，需要性感上陣，Leslie坦言：「為求以最佳狀態示人，都承受唔少壓力，一嚟自己畀壓力逼自己，二嚟公司亦想我再減得fit啲，加上同戲嘅其他女主角個個身形都好fit，排埋一齊就高下立見！」
Leslie續說：「今次套戲大家唔同路線，自己係行『性感小野貓』呢類feel，身形一定要配得起呢個角色，呢啲係做演員對觀眾嘅基本尊重，亦係對公司嘅承諾同回報，話晒公司畀咗咁多資源去train我。雖然拍戲嚟講，我仲係一個好新好新嘅新人，開拍時一定會好緊張，但既然加入得公司，我就會加油做到最好！」
誓整靚腰形
問到Leslie有何keep fit秘方時，她說：「最主要都係做多啲運動，我每日都最少做30分鐘帶氧運動，亦有勤力跑步，同埋一定要控制好飲食。因為自己好鍾意食嘢，開頭唔知頭唔知路，初初影宣傳照嗰陣放飯，仲傻更更拎晒成個粟米斑塊飯嚟食，點知見到經理人望一望我、又望一望盒飯，我即刻呆咗，一啖都唔敢再食！我應承經理人一定會畀心機keep fit，自己知問題出喺邊，雖然依家磅數瘦番，但啲肉唔夠實唔夠firm，要修番好個線條，尤其係個腰位，要操fit個腰形最難，真係要靠自己意志，勤力做sit up，想靚就一定要付出代價。」
文：陳丹
攝：榮