莊思敏引「同鄉」喪撩

由莊思敏、崔碧珈（Anita）、陳婉衡及岑日珈等主演的葉念琛監製新片《PG戀愛指引》，講述多位Promotion Girls的生活及情路波折。早前莊思敏在銅鑼灣拍攝街景，要搽黑塊面並穿上公仔衫扮成「人形朱古力」與「細細粒」陳嘉佳對戲，吸引大批市民圍觀，搞笑的是大部分市民起初都認不到是莊思敏，到後來有人估到是她，即議論紛紛，難得莊思敏毫不尷尬繼續投入拍攝。

唔怕被人搶鏡

當日已連續開工多個小時的莊思敏雖已攰爆，但仍樂在其中自誇打扮相當得意：「之前未試過笠公仔衫，原來係幾辛苦，以後會更尊重呢類工作人員！（有冇尷尬？）冇呀！預咗大家唔認得我，我搽黑塊面之後仲去咗睇電器同睇衫，今日假期周圍有好多菲傭印傭，佢哋係咁撩我講嘢，可能以為我係同鄉添！」今次角色經歷較慘，思敏說靚女造型交由其他女演員負責，她不怕被搶鏡：「同葉念琛合作多次，多謝佢安排個充滿突破嘅角色。」

「人形朱古力」	葉念琛（右起）安排陳嘉佳、莊思敏對戲。	崔碧珈狀態大勇。

崔碧珈有床戲

至於Anita則拍一場向感情騙子陸駿光報復的戲，在街上追打他，兩人更將有親熱戲：「之前我拍啲戲雖然打扮性感，但床戲都係第一次，所以好緊張，要向陸駿光請教。」陸駿光即說：「我都好驚拍呢啲戲呀！最近又食肥咗要Keep吓，不過個個都望Anita啦！唔會睇我。」早前Anita因病停工數月，現已回復狀態，F Cup上圍依然屹立不倒。

文：影視組