祖兒跑唔郁呻膝頭風濕痛

天后容祖兒昨日出席兒童愛心馬拉松活動，她稱會叫朋友一起參加，但自己只會跑一小段：「因為我唔適合跑，我跑短途先得，所以渣馬嗰啲搞唔掂。氣嗰方面我就大量，係膝頭哥痛，有啲風濕。早幾日喺韓國拍嘢，好凍，又唔夠衫，寒風刺骨，即刻搵啲熱嘢敷一敷，度度都冇問題，係個膝頭壞壞哋！」她又指自己已不斷尋求秘方。問到為何不找人幫她按摩？她說：「搵人就唔係按摩咁簡單，仲要佢學埋針灸同氣功治療。」

飆高音撐克勤

祖兒謂農曆新年及情人節均在美國與好友李克勤舉行巡唱，問到男友劉浩龍可會相隨？她笑說：「仲諗緊，佢咁多人要拜年。」她又謂母親這次不會同行，因為當地太凍：「我覺得佢好似唔應該去啲咁凍嘅地方，同埋呢輪都去得太多旅行喇。」提到克勤參加內地歌唱比賽《我是歌手4》，祖兒大讚他表現一等一。問到若邀請她可會參賽？她說：「踢館？我驚喎，驚自相殘殺！協助就可以，我好樂意，我飆高音依家開始練定先，練定唔同方面嘅雜技。」

祖兒及蔡卓妍為阿嬌慶生。	壽星女阿嬌錫晒梁浸浸。	容祖兒呼籲朋友參與兒童愛心馬拉松。

爭住咀梁浸浸

昨日是好友鍾欣潼（阿嬌）的35歲生日，祖兒坦言還未送禮物給對方，但就讚自己乖，一落機便去參加對方的生日派對：「首先同佢食咗餐飯，再去同佢唱K，如果唔係有活動我一定撐到底，但我早走咗。佢都玩得好開心，張單又係楊生（老闆楊受成）埋嘅。」而阿嬌前晚的生日派對上還有蔡卓妍、鄭希怡（Yumiko）、陳妍希等一大班好友，Yumiko更帶同女兒「梁浸浸」到場，連壽星女阿嬌及祖兒亦嘟嘴錫錫「梁浸浸」。

文：音樂組

攝：鄭家俊