蕊蕊捱餓撐男友：當宣傳

藝人金剛早前被指在台灣為無綫拍攝節目時背女友陳蕊蕊暗撻台妹，他昨日在長沙灣為無綫節目《街坊廚神舌戰愛情食物鏈》拍攝外景時受訪隨即否認，笑言：「覺得件事好搞笑，話我抄牌，我連嗰個女仔叫乜嘢名我都唔知，有乜理由話我抄牌吖，咁奇怪嘅，我覺得好有問題。」之後金剛更大拋書包，直指報道「子虛烏有」。

各為事業拚搏

而金剛亦否認與蕊蕊分手一事，直認與蕊蕊關係如常，各自為事業拚搏：「我三十五歲人喇，希望有番個事業，（蕊蕊鍾意你個人就夠？）得個人都無用o架！唔通喺度食西北風呀？（蕊蕊缺乏關心疑患抑鬱？）我好少問佢今日做咩，尋日做咩，我都唔會check人，如果係因為工作有抑鬱，咁我都有啦！不過我就無表現出嚟！」

陪去台灣拜年

而蕊蕊前晚於荃灣出席晚宴時即使捱住肚餓搞亦為男友護航：「金剛都解釋咗係同梁烈唯拍攝節目，個女仔係嘉賓。（呷醋？）做嘢啫，工作（對象）唔係男仔就係女仔，我未睇個報道，佢已經同我解釋。（佢好着緊？）OK嘅。（傳你哋分手？）唔係，唔知點解有咁嘅傳聞，可能佢有節目出街，當宣傳啦。（話你搬走？）唔係，冇諗過搬走。」蕊蕊更表示若農曆新年有空檔會陪金剛回台灣拜年，果然得體！

文：影視組