溫碧霞「峰」殺方皓玟
藝人溫碧霞（Irene）前晚偕方皓玟、譚耀文出席新片首映，現年35歲的方皓玟留「前」鬥「後」，與年近50的Irene齊齊大晒玉背，可惜被對方秒速「峰」殺！Irene更揚言票房過億請去旅行，認真闊綽！
溫碧霞（Irene）、譚耀文與方皓玟前晚出席英皇電影《愛在深秋》首映禮，好友蘇志威與太太劉小慧、陳家樂、王嘉慧和老闆楊受成等均現身撐場，場面熱鬧。身兼監製及女主角的Irene，與方皓玟齊齊以露背裝示人，「峰」頭卻被穿上銀色Deep V裙的Irene搶去，非常性感！
譚耀文開心唔使奸
為人父母的Irene與譚耀文均表示，子女年紀太小未有帶來睇戲，譚耀文亦笑稱：「我啲小朋友好細，未識欣賞，不過都值得睇，因為爸爸今次唔係做反派。」兩人稍後前往內地各省宣傳，預計至上映日（22號）完成工作後，將於農曆年出埠度假，Irene說：「希望票房好，如果有『億』字，我請大家去峇里島玩，我覺得第一部戲唔可以太貪心，最緊要有好反應、好口碑，觀眾鍾意我就拍落去。」譚耀文即笑道：「我一家三、四口，請晒我哋去旅行好平o架咋。」他又透露新年與家人到澳洲旅行。
提到世界各地頻頻發生恐襲，會否擔心去峇里旅行的安全問題？Irene說：「啲島好安全，通常我哋去好安全嘅哋方，所以唔會太擔心。」並謂即將為內地劇到英國取景一周，她說：「驚就唔會太驚，但自己出入會小心啲。」本來打算去歐洲的譚耀文，也直言早前發生恐襲而打消念頭。
至於四月舉行演唱會的方皓玟，打算表演自己最不耍家的跳舞：「我本身手腳唔係好協調，跳舞係好大嘅挑戰，好驚影響公司要使多啲錢畀我補鐘。（跳性感舞蹈？）未排，但開會揀咗幾首歌改編成跳舞一part，希望以一個動感啲嘅自己畀大家睇。」
文：影視組