連詩雅冇膽「挑機」 同細路爭地盤

歌手連詩雅（Shiga）、模特兒鍾浠文（Zelia）及黎紀君（Christy）三為一體，早前相約試測膽量，到設有多款刺激機動遊戲的「東華慈善嘉年華」遊玩，近距離看到以挑戰人體極限聞名的「陀飛輪」及跳樓機，Shiga和Zelia率先表示膽怯，Christy語帶興奮說：「我冇佢哋咁驚，我係會主動拉人上去玩。」

喊完唔敢再玩

膽大的Christy見在場還有其他不同的玩意，故最後亦徇眾要求，轉戰到兒童遊戲區玩樂。問到有否跟男友玩機動遊戲的經驗？去年承認與有米男友Anthony拍拖的Shiga說：「我依家同任何人都唔會玩，對上一次都係同柏豪喺美國做嘢時玩過，嗰次為工作而犧牲，玩完喊到停唔到。」

鍾浠文（左起）、連詩雅、黎紀君齊齊撇甩男友，相約到嘉年華試測膽量！	鍾浠文（左）和連詩雅（中）望見「陀飛輪」即臨時縮沙！	三位靚女在兒童遊戲區「賽車」一樣玩得盡興。

想同男友跳傘

有圈外男友的Zelia，指男友性格較悶，故跟對方約定作出跳傘的大膽嘗試，圖增添生活趣味：「佢同我都好靜，生活冇趣味，所以佢話如果要刺激就去到盡去跳傘，我見有啲人跳傘時，會寫啲字喺手心如I Love You或對方個名，攤開雙手影相留念，自己好想同男友做一次咁嘅浪漫事。」而Christy自稱與男友均「膽生毛」，說「有次去日本旅行，我哋呃咗個朋友去玩迪士尼一個機動遊戲，搞喊咗佢，不過我哋就好開心勁笑。」

服裝：tout a coup @i.t

文：名人組