撈Duck掂買車何浩文當獎勵
「鴨王」何浩文（Dominic）最近撈「Duck」風生水起，拍攝《鴨王2》的片酬更三級跳，日前被《好報》發現到車行試車兼唔貴唔試，睇中近300萬的超級跑車。他接受電話訪問時承認有意買車慰勞自己：「之前一直喺內地跑騷，都辛苦啊，想慰勞吓自己，加上買咗新車可以借畀老竇揸，一舉兩得。」不過，他透露仍心大心細，未扑槌買入心頭好。
另外，Dominic昨日亮相周年晚宴，自認單身的他透露想請心儀對象兼酷似舊愛「糖妹」的新歡唐紫瓊睇《鴨王2》首映：「了解中，想請佢睇首映，佢睇完接受到就再進一步發展。（對方被指有男友？）有人想借我炒作新聞。」
