鍾麗淇哺乳谷胸升cup換bra

前藝人鍾麗淇於去年11月誕下二女,昨日她出席活動時透露現正餵哺母乳,由於在谷奶階段,因此上圍升cup不少,要更換所有胸圍,雖然暫時還未能修身,不過為了女兒健康,也是值得的,而今年已屆40歲的她,笑言應該不會再追,讓肚皮收工。

淡出幕前轉做瑜伽導師的前藝人鍾麗淇去年11月誕下二女Michela,昨日她出席活動時被發現上圍十分豐滿,她解釋因為正在餵人奶中,谷奶令上圍升cup,笑指要買過新的胸圍:「依家餵緊人奶,阿女每兩個鐘就要食,所以我今日出嚟前都要泵定先,佢依家七周大,重12磅,好大隻,已經想企,同大女好唔同,但佢食得好,我都好開心,不過都想快啲餵完人奶,快啲收身。」問她何時再開瑜伽班?她說:「我希望三月啦,不過係做高溫瑜伽先,因為少啲上身嘅壓力動作,其實我又唔係好大,有啲外國女人仲勁都有照做。」記者追問她可會再追兒子?她說:「好敏感喎,啱啱生完問呢個問題,但未必會,因為2016年我都40歲喇!」

汪詩詩戥圓圓辛苦

而同場的「宇宙最強」甄子丹太太汪詩詩亦有現身,她透露聖誕帶同子女陪伴丈夫到台灣等地宣傳電影,除夕就一家人在香港倒數;談到快將生產的妹妹汪圓圓近況如何?她說:「佢個肚好大,但仍然好靚,佢好重,重過之前嗰個,依家佢行路或者起身,乜都要慢啲,因為個肚太大,做媽媽真係好偉大,見到佢都辛苦。」

周嘉玲打工有代溝

至於另一前藝人周嘉玲就表示工作十分繁忙,因為除了應付其童裝生意外,還要「上班」:「呢幾年返番去舊公司幫手做顧問,我6年前開舖,依家同6年前好唔同,我覺得都有少少代溝,返番工個人冇咁脫節!」已育有一名7歲女兒的她被問可會再生?她笑說:「難啲,我先生梗係想,不過我嘅年紀就算有都會好攰,冇咁嘅精力。」同場嘉賓還有名媛陳君宜與黃泳霖、名模歐陽妙芝。

文:名人組