陳慧琳V到肚臍 搽油驅風
潮媽天后陳慧琳（Kelly）相隔近八年再踏紅館，期間大解放穿超Deep V開到落肚臍的連身衫，大騷舞技兼擘髀自摸，狀態fit爆，更自誇「結婚好似勁！」而嘉賓張家輝在台上笑Kelly太性感會着涼，Kelly即抵死回應要搽油驅風。
陳慧琳一連九場的《陳慧琳let's celebrate!世界巡迴演唱會》，前晚於紅館開鑼。甫開場Kelly唱了幾首快歌熱身，之後換上一襲白色斜膊飄逸仙子裙騷香肩，再唱出多首經典情歌冧歌迷。
張家輝蝦碌
Kelly全晚換了多套歌衫，最性感的一套是黑色超Deep V貼身jump suit，Deep V開到落肚臍，將其fit爆身材表露無遺。其後Kelly單拖騷舞技，期間還趷籮、扭腰、擘髀自摸，令全場high爆！她還笑問歌迷：「好唔好睇？我仲得唔得？」音樂總監雷頌德讚Kelly勁，Kelly搞笑說：「結咗婚好似勁啲！」
接着有與Kelly同屬經理人鍾珍旗下的張家輝任嘉賓，家輝一上台即對Kelly說：「你個Deep V開到落肚臍，有冇搵泥膠黐住？驚佢攝親。」Kelly即抵死回應：「下面搽油驅風！」
家輝又呼籲在場觀眾買飛看其新戲《陀地驅魔人》，之後唱出電影主題曲《你是我心愛的姑娘》，不過他唱了幾句就忘詞，要重唱。
「匿埋生仔」
到Encore部分，Kelly穿粉紅色露肩公主裙升上台，佩戴價值7位數的珍珠和鑽石頸飾，並感觸爆喊說：「最多謝大家，咁多年嚟都支持我，我匿埋生仔、冇歌出都支持我，我盡咗力，阿媽嘅力係咁上下，多謝你哋令我事業發光發亮！」最後雷頌德拿結他出場，與Kelly合唱《紀念日》作結。
文：音樂組