周焯華帶仔女遊日老婆冇隨行
太陽娛樂老闆周焯華與正印陳慧玲（Heidi）及紅顏Mandy Lieu的三角關係，隨Mandy日前突回歸兼高調與男方拖手，再爆出Heidi喊離婚而再掀高潮。據知，在機場單拖現身的Mandy，原來悄悄攜B女返港，前日更被目睹抱女遊銅鑼灣，懶理周焯華與Heidi就離婚一事拉鋸。而周焯華昨日則與仔女赴日旅行，Heidi未有同行。
Mandy Lieu自倫敦產女後，一直待在當地照顧女兒，絕迹香港一段日子，惟日前突然從倫敦返港，甫落機即相約周焯華到九龍城吃火鍋，然後雙雙返男方送贈她的西半山億元豪宅，最爆是二人高調世紀拖手，有指此舉觸怒了Heidi，令她決定忍痛離婚。正當大家以為Mandy今次單拖返港會周焯華之際，本報收到消息，其實Mandy這趟回來，女兒亦有同行，日前落機只見她一人出閘，相信女兒早被安排調虎離山。Mandy與周焯華大前日世紀一拖後傳Heidi即喊離婚，不過Mandy一於懶理，前日被目睹無懼寒風，抱着愛女閒逛人來人往的銅鑼灣，心情絲毫沒受影響。
Heidi態度軟化
離婚消息傳出後，Heidi前晚接受《東網》訪問，身在澳門的她被追問離婚一事，她卻說：「唔好寫住，我收咗太多電話，真係唔想回應住！」態度明顯軟化。
另邊廂，男主角周焯華昨早近八時，與長子及二女現身香港機場，一家三口到日本旅行，同行未見太太Heidi。穿上黑色外套的周焯華見到數十名記者，表現有點不耐煩說：「唔好行埋嚟，夠喇，影夠就走，唔好影細路。」記者一直追上，問到是否去日本？至入閘前他才開口回答：「係。（係咪要處理家事先？）冇嘢講。」而囝囝則捉着妹妹隨行，問到父母是否離婚以及有沒有影響心情？兩人均沒有回答便急急與父親入閘。至於Heidi的閨蜜李碧君（Sophie）昨在臉書寫道： 「真正的美不是高不可攀，無瑕無疵，而是經過歲月琢磨後那種歷練轉化，被苦難衝擊的堅毅不屈，最後雖然千瘡百孔仍笑看風雲，才是經得起風霜打磨的美。」她接受《東網》訪問時否認有弦外之音，並透露昨日有跟Heidi見面，問可有慰問對方離婚一事？她說：「我哋未傾到呢啲喎，都係講吓小朋友，閒話家常咁！（佢係咪仲嬲緊所以唔去日本？）其實佢之前都冇特別話過會去，有時呢啲family trip各自同小朋友去，唔出奇！」她又謂暫時不方便回應甚麼，作為朋友就一直默默支持好了！
劉浩龍唔敢過問
此外，藝人劉浩龍昨日出席聖誕溜冰慈善活動啟動儀式，講到公司老闆周焯華傳跟老婆陳慧玲離婚，他表示不知情：「好難答，人哋家事，仲要係老闆，我哋做細，冇乜特別好講。」他亦謂沒有聯絡對方：「好少睇新聞，除非關自己事。（真係離婚覺得可惜？）真係唔知。」他又透露聖誕會在工作中度過，但之後會跟朋友和女友容祖兒慶祝。
文：名人組