連詩雅《巨星放題》稱霸封IQ女王
最強娛樂資訊《東網巨星》App推出的遊戲節目《巨星放題》，自播出以來深受歡迎，節目由18位藝人挑戰IQ題和冷知識，經過三輪激烈賽事，「長腿娃娃」連詩雅（Shiga）盡情發揮她的急智本色，成功砌低其餘三位才女周秀娜、陳瀅和楊詩敏（蝦頭），以由頭贏到尾的姿態，勇奪首屆「放題IQ王」女王寶座。
《巨星放題》來到最終回，連詩雅果然美麗與智慧並重，面對考官「Dr.吹神」陳奕迅、「Miss Kay」謝安琪和「Professor Hins」張敬軒的高難度「放題」，Shiga以大比數擊敗周秀娜、陳瀅及楊詩敏奪冠。Shiga勝出後興奮大叫：「好嘢，勝利係屬於我嘅！冇諗過竟然會贏到，所以好開心。其實每個星級主持嘅問題都好難，但我都盡力作答，我有幾題有錯，所以冇諗過會贏，多謝大家同我自己，同埋今次個遊戲好好玩，問咗好多得意IQ題，希望下次有機會再玩。」
Eason自誇口才了得
而《巨星放題》推出以來，能贏得極高點擊及瀏覽人次，除參賽藝人的號召力，最大功神是三位星級考官陳奕迅（Eason）、謝安琪及張敬軒，網民都激讚三人令節目生色不少。
獲網民讚生鬼、幽默的Eason謂：「今次幾好玩，唱歌唱得多，做考官應該係第一次，我覺得自己表現OK o架，不過可以再好啲。Kay同軒仔都好出色，我哋三個唱歌嘅，口才梗係有番咁上下！」對於Shiga獲勝，Eason謂：「Shiga係幾醒，要畀個叻佢，因為我哋啲問題有啲好刁鑽，唔好話藝人朋友諗到抓頭，我都覺得難。今次我學識唔少搞笑IQ題，仲有好多同生活有關嘅冷知識，話咁快十集就玩完，下次有機會調換角色，由佢哋發問，我答，到時睇吓我啲IQ有幾掂！」
Kay為題目「加料」
Kay亦讚自己眼光獨到：「Shiga實力深不可測，之前都睇好佢，證明我眼光冇錯。」對於提問時的嬌柔美態冧暈不少觀眾，Kay笑言：「啲問題寫嗰時比較平白，我就加咗啲擬人法，都幾鍾意啲歌手朋友嘅反應，最深印象係傅嘉莉，佢講咗『梯形嘅面色』，好正喎佢，好深呀嗰條問題，笑死我，覺得佢好有童心。」Kay對Eason亦讚口不絕：「留意吓問問題個肥仔，唔錯o架，好趣致，佢爆出嗰句jajambo呢，已令大家好開心。」
原來軒仔也貼中Shiga會贏：「Shiga勝出一啲都唔出奇，一睇就知佢冰雪聰明，美貌與智慧並重。」軒仔稱在出題考人時，同時都有考埋自己IQ，確實獲益良多，有機會也想做參賽者挑戰一下。
文：音樂組