童言真摯 打動人心 兄弟食Pizza嘲諷全球化

印度小品不時充滿驚喜,《兩個小孩的Pizza》(The Crow's Egg)講貧民窟兩兄弟機緣之下見識到「來路美食」Pizza,決心搵錢一圓食Pizza夢想,最後意外搞出大頭佛更成為新聞人物,以小朋友的故事寸爆大人世界,諷刺政治黑暗及全球化的影響,意味與玩味齊集!

由小朋友主導電影先要有演得自然的小演員,哥哥由知足變多心,闖禍後變成熟都見真情流露,細佬天真可愛帶到尾,不時令人會心微笑。同樣講台詞,比起香港走入議會「交戲」的小朋友更加動人,而電影尾段講到政客為利益擺小朋友上枱亦相當貼近現實。

寸官場以外,電影亦關注全球化的影響,貧民窟開貴價Pizza連鎖店,與故宮開名牌咖啡店一樣忽略社會文化,缺乏同理心的善心,與「自high」捐小背心予旱災災民無異,值得深思。

具深度惹反思

故事由小及大,有深度但未見沉重,而且不時有幽默笑位,搭上輕鬆洗腦配樂,兩兄弟出盡法寶搵銀,於困境下知足常樂及真摯懂事的童言都更易打動人心。對有得玩有得食先為王道的小朋友講政治僅得啖笑,但尤愛導演選擇藉小朋友講古,淺入平實之餘亦惹人反思,稚子無辜,父母「被同化」任憑價值觀扭曲,將來傷害的也是孩子。

文:常歡