方力申砌低浩龍 明星賽稱王

一年一度的《澳門格蘭披治大賽車》昨日進行比賽，其中雲集眾多藝人參加的「明星蓮花挑戰賽」自然成為焦點之一。雖然在前一日的排位賽中，莊思敏和苟芸慧均曾發生意外，幸昨日正式比賽時未有再發生驚險場面。而賽前太陽娛樂文化老闆周焯華、古天樂、劉心悠、蔚雨芯等都有現身賽道為車手打氣，跟余文樂同樣被捧為大熱的方力申，則有女友鄧麗欣到場手握手打氣，而同樣有份參賽的劉浩龍，其女友容祖兒亦有到場及任頒獎嘉賓。

反超前余文樂

最終小方順利完成賽事之餘更勇奪冠軍，亞軍為浩龍，反而大熱的余文樂只能屈居第三。榮升「車神」的小方大談奪冠過程表示：「余文樂中間過咗我一次，之後佢架車有事，被我過番，跟住到浩龍喺我後面，浩龍有段時間追得好近，一路我就希望快啲完，唔好再追上嚟，好辛苦，希望比賽快啲完，最後贏到真係好榮幸。」

方力申有女友鄧麗欣在旁打氣，成功奪冠！

劉心悠（左）與容祖兒走落賽道為車手打氣。

小方直言大家就賽道的認識都只有十個練習圈，他說：「大家都係打天才波，同埋靠之前做嘅功課。好開心攞第一，雖然我哋唔係專業，但對我來講係好好嘅經驗。」至於一向屬「快車手」的余文樂，今次只能屈居第三的原因是戰車有故障，阿樂說：「都係僥倖，安全第一，最緊要大家都冇事。」

容祖兒沒親手頒獎給男友劉浩龍，反而頒給余文樂。

劉浩龍與賽車女郎合照，唔怕祖兒扭耳仔？

乘虛而入喪追

而浩龍成功奪得亞軍，女友容祖兒都有出現在頒獎台，不過祖兒只頒獎給季軍的余文樂，浩龍就獲吳奇隆獻花，不過浩龍領獎時，祖兒有狂拍掌。問到祖兒為何只頒獎給季軍？浩龍表示：「我都唔知邊個頒獎，不過都好開心，吳奇隆係我一個好鍾意嘅偶像，好榮幸得到呢個獎！」提到比賽時的心情，他大表緊張說：「個個都叫我小心，因為我都幾細膽，今日一起步我就慢慢嚟，慢慢衝上去。都見到樂仔（余文樂）同小方大鬥法，見佢哋有碰撞之後，我都跟前少少，不過就見到樂仔唔好彩，架車有故障，我就走去追小方，都好開心攞第二，可以上澳門嘅頒獎台。」另外，頒獎嘉賓吳奇隆報喜，其北京公司邀得藝人蔚雨芯加盟。文：音樂組