徐天佑做老襯「蜜」謀製孖B

組合Shine成員徐天佑昨日小登科迎娶拍拖八年的圈外有米女友Olive,疼錫老婆的天佑傾盡身家豪花二百萬在洲際酒店筵開卅六圍,戴上兩卡求婚鑽戒的新娘子拖實老公見傳媒,並應要求三度「咀嘴」,天佑揚言稍後到日本度蜜月時會火速炮製龍鳳胎。

32歲的徐天佑早已表明沒有接新娘遊戲,故昨晨接新娘時毋須過五關斬六將便成功抱得美人歸,一對新人十指緊扣步出洲際酒店。

讀誓詞感動眼濕濕

兩人在大衿姐帶領及灑米下登車去行大運並出席於半島酒店舉行的註冊儀式,問到天佑心情如何?他說:「好開心、好興奮。」兩人換上婚紗及禮服在親友見證下宣讀誓詞,Olive哭成淚人,緊張的天佑未開口已激動至左擰右擰兼眼濕濕,場面感人。

傍晚六時左右天佑拖實老婆會見傳媒,穿上Tube Dress婚紗的Olive戴上兩卡求婚鑽戒及婚戒,二人在鏡頭前三度「咀嘴」,由於新娘子怕醜,天佑獨自接受訪問,他坦言籌備婚禮難搞過演唱會,問到老婆有否分擔?天佑說:「佢負擔審美,婚宴外條樓梯布置佢諗咗好耐。」對於有指花上二百萬身家搞婚禮,天佑笑說:「使少少啫,一路有儲錢,結婚一生人一次又係件大事,應使得使啦。」

清醒見證珍貴時刻

記者大讚徐太的鑽戒很閃,天佑說:「係呀,兩卡求婚戒,今晚會戴埋對黃鑽耳環,係朋友設計友情價,今次贊助唔多。」並透露稍後會與朋友到日本旅行:「唔係二人世界,之前我哋都去過好多地方,今次會去日本睇紅葉。(順手造人?)自己都想,愈大愈想有小朋友,盡力啦,老婆話睇我,因為女家有孖胎紀錄,希望龍鳳胎一次搞掂。」

問到婚宴是否不醉無歸?天佑說:「好想享受每個時刻,所以十點半前唔飲酒。(有冇特別表演畀老婆驚喜?)會唱陳百強嘅歌《有了你》。」天佑提到中午讀誓詞時淚流滿面:「以為自己會好理性,見到外父好感觸。」另外,天佑前晚在微博上載一張姨甥仔在其床上狂跳的照片,寓意「年生貴子」。文:音樂組