郭嘉文極速擔正反勝麥明詩

應屆港姐季軍郭嘉文（Karmen）日前自爆已與無綫簽約兼有機會參演劇集，想不到昨日便以女主角身份出席新劇《廉政行動2016》開鏡拜神儀式，還獲被安排大合照時企在中間，由出爐新加坡視帝陳展鵬傍實！對於當選不到半年便極速擔正，Karmen坦言感激公司提供機會，問到會否怕上位太快？她說：「要睇自己演戲嘅天分好唔好，公司畀呢個機會我，當然唔想令公司失望，都想拎多啲經驗。（冠軍麥明詩同亞軍龐卓欣唔簽約造就機會？）佢哋係同公司傾緊合約，各有各忙。」

邱導：唔係隨便搵

劇集導演邱禮濤接受電話訪問時直認有份揀角，一心打算找新面孔飾演，加上由無綫介紹的Karmen擁有一定知名度，認為有新人出現是好事：「唔係隨便搵，角色前設係『新』調查員，唔會搵個似40歲嘅人嚟做。」對於郭嘉文成為最快拍劇的港姐，麥明詩亦戥對方高興：「當努力遇到機會時就會成功，我知嘉文一直都好努力，希望佢快啲建立佢嘅事業！」而龐卓欣亦開心聽到嘉文有份演出：「祝福佢呀！知佢一心想入娛樂圈，希望佢今次要畀心機，一定會做得好好！」

當選港姐未夠半年的郭嘉文火速擔正女主角，但她不擔心上位過急。	雖被郭嘉文（右起）爬頭，但麥明詩與龐卓欣戥對方開心。	傅嘉莉（左起）與郭嘉文獲無綫力捧，梗係要多謝曾勵珍。

樂易玲讚適合演戲

無綫高層樂易玲稱郭嘉文與龐卓欣都適合演戲，而口才了得的麥明詩則較適合做司儀或主持工作，一切待她們考慮清楚才決定發展計劃。將與Karmen有甚多對手戲的陳展鵬透露，最近忙爆有三劇在身，月底更要隨《巨輪II》大隊到日本拍攝。展鵬指對《廉》劇充滿信心，尤其首次與邱導合作：「睇佢電影就多，今次終於有機會合作。（希望拍電影？）梗係好啦！」

文：影視組