陳展鵬拎視帝即開工黃穎君佩服敬業精神

藝人黃穎君(Burmie)有幸與《星和無綫電視大獎2015》出爐視帝陳展鵬在新劇中合作,她對展鵬捧完視帝翌日即返香港拍劇的專業態度,相當佩服,她說:「見到展鵬攞獎,我哋成班《城寨英雄》演員都戥佢開心!但見到佢攞完獎即刻返香港繼續拍劇,雖然好攰,但為咗唔想拖延拍攝進度,佢都照樣撐住繼續開工,睇到佢只能夠喺等埋位啲時間瞓一陣,開工又即刻變得精神,我覺得佢呢份毅力好唔簡單,好值得我哋學習同尊敬!」

Burmie又指自己在新劇亦要打埋一份,她說:「劇入面有好多動作場面,好多演員都要打,我雖然冇展鵬、胡定欣等主要演員打得咁厲害,但都要打埋一份,試過打到手臂同小腿有瘀痕,都怪自己平時無練開武術,開始覺得自己真係好孱!」