鄭伊娜暗示舊愛花弗
藝人鄭伊娜昨日以萬聖節鬼怪look到銅鑼灣出席活動，她指怕被鄭爸爸鬧：「今日呢個妝出自化妝師手筆，化咗一個鐘，本來想喺塊面整埋爛面效果，但唔夠時間，我唔敢畀爸爸知我化呢個妝，因為佢連我戴骷髏骨頭嘅鏈都鬧，話好邪，所以今日我係先斬後奏。」
問她有否留意前男友與林芊妤（Coffee）傳拍拖？伊娜強調：「嗰個唔算係我前度，我哋冇拍過拖，冇聯絡，冇應承過佢。（佢有追你？）係，但我揀男友好揀擇，要專一、有誠意至考慮。
（你指有人唔專一？）大家睇喇，我就寧缺莫濫。（提Coffee注意？）同佢唔熟，或者佢睇報紙啦！（個男仔之前同趙哲妤拍拖？）嗰次我都有祝福，諗唔到咁快轉。」