唐貝詩胎教睇殺人片 大個冇嘢怕

藝人唐貝詩(Lydia)自細已經鍾意萬聖節,恐怖片更加是她的至愛,Lydia笑言:「媽咪話可能我喺佢個肚嗰陣,Daddy成日睇殺人片,所以我生出嚟就唔驚!」她更指萬聖節一定要恐怖:「唔恐怖扮嚟做咩啊!」

名媛寇鴻萍的女兒唐貝詩(Lydia)表示自己從小已經鍾意萬聖節,因為萬聖節令她聯想起糖果和扮不同的造型,完全滿足她愛打扮的心,而且和聖誕節一樣,當她看到周圍的布置和氣氛,心情便會自然非常好!Lydia又指不覺萬聖節是恐怖的節日:「我同妹妹細個真係有問鄰居拎糖食,我哋會搭Lift去大廈最高嗰層,跟住就逐層落,敲門問人攞糖!」

雲頂見怪影

Lydia自爆恐怖片是她的至愛,睇完不會睡不着之餘,更會期待睇下一套鬼片:「我鍾意嗰種緊張嘅感覺,但我唔係話唔驚,我睇嗰時會嗌,會捉住隔籬嗰個。我啲朋友好鍾意同我睇鬼片,因為我會將娛樂性加幾十倍!媽咪話可能我喺佢個肚嗰陣,Daddy成日睇殺人片,所以我生出嚟就唔驚!」她更表示對演恐怖片感興趣。

為工作,Lydia早前去了馬來西亞雲頂,她說:「個個都話雲頂好猛鬼,但我唔驚,仲不知瞓得幾舒服!我玩『直播』嘅時候,好多人留言話後面有人影,喺度嚇我。嗰下都驚一驚,話我唔玩啦!但太攰嘅關係,cut機之後都照瞓得好好!」

黑寡婦上身

而今個萬聖節Lydia落足心思,扮成「冷艷黑寡婦」,恐怖之餘,不失艷麗。Lydia穿上黑色貼身透視裙,高衩剪裁令她可以盡騷美腿:「今次我行比較型嘅路線,塊面畫咗隻蜘蛛仔吊喺度!」問到過往有沒有化恐怖妝,她說:「我上年嗰個look好恐怖o架,係縫住咗個嘴。我知好多人萬聖節會Cosplay漫畫角色,但我覺得唔得囉!因為萬聖節就梗係要恐怖o架啦!唔恐怖扮嚟做咩啊!」

文、攝:甄之慧

場地:Phocushk

妝髮:Shanny Au

服裝:V.Charm