歐陽震華 萬綺雯 王浩信 喪C爆笑出動

蚊蚊更踢爆Bobby與浩信曖昧關係，令她相當不滿！

魔王十秒變臉

藝人歐陽震華、萬綺雯及王浩信因拍攝台慶劇《東坡家事》成為好友，三名大細路趁萬聖節將至開P，蚊蚊扮女巫隱約騷招牌長腿，並安排浩信扮喪屍，Bobby戴魔鬼角披斗篷扮魔王。

三人拍照時鬼主意多多非常投入，Bobby表演十秒變出十個誇張表情，技驚四座，他又要求將現場燈光校暗，務求令氣氛更恐怖，但效果是搞笑多於驚嚇！期間Bobby取笑蚊蚊魔鬼面孔天使身形，令蚊蚊啼笑皆非，他又將黑色膠紙剪做月亮形及星星形乳貼，笑言扮相太激凸嚇人，認真冇佢收！並說：「我最鍾意對角有毛生出嚟，令我感覺似拍洗頭水廣告！」

女巫蚊蚊打算騎掃帚扮飛，豈料掃帚太短未能成功，兩人又突然加戲咬實浩信外套，笑爆全場！至於浩信長期勁入戲保持呆滯眼神，但他事後笑言不知自己在扮甚麼，蚊蚊解釋：「我想你扮喪屍，但唔好意思叫你化喪屍妝咋嘛！」Bobby即搞Gag說：「你（蚊蚊）係喪A，我係喪B，佢（浩信）就喪C！」

扮木乃伊最笨

提到萬聖節回憶，Bobby表示初入行時參加過扮嘢Party，當時他扮中國殭屍贏得比賽亞軍：「當時我嗰組好落力玩係咁跳，厚顏無恥呢樣到依家仲Keep到，有班木乃伊由下午已經包繃帶，食飯都冇人幫佢哋拆，最後佢哋贏咗，但都唔知係邊個，萬聖節扮木乃伊真係最笨！」蚊蚊表示每年都會準備糖果給鄰居小朋友，但很少盛裝扮鬼，浩信亦表示甚少湊熱鬧：「萬聖節比較少玩，今年可能買個南瓜畀個女，佢好細膽（口架）！」

文：立影　

攝：張福宏

場地：九龍東皇冠假日酒店

萬綺雯服裝：www.dorisq.com　

髮型：Dominic Tao（Pi4.com.hk）