楊受成勁冧老婆 霆鋒chok住到賀

楊生楊太的30周年「珍珠婚」紀念，昨晚假金鐘港麗酒店舉行，筵開29席招待親朋，雲集不少演藝及商界名人如「玩具大王」蔡志明、TVB主席陳國強及徐子淇丈夫李家誠、劉嘉玲、鄺美雲、毛玉萍等。英皇旗下歌手謝霆鋒、容祖兒、Twins、古巨基和張敬軒等統統盛裝出席，場面衣香鬢影，戴黑超的霆鋒更邊行邊chok，貫徹chok王本色。

斥巨資邀老牌樂隊

宴會場地以簡約布置為主，據知楊生更斥巨資邀請以一曲《Only You》紅遍全球的美國老牌樂隊The Platters到場擔任表演嘉賓。晚宴前，一身黑西裝配「煲呔」的楊生，及穿閃爆tube dress裙配重量級首飾的楊太先會見傳媒，不過楊生的子女們保持低調，未有隨楊生一同影大合照。

霆鋒chok住到場，不失chok王本色。	「玩具大王」蔡志明與老婆恩愛赴會。	李家誠未有偕徐子淇同行。

楊生直言原本打算跟太太和家人低調慶祝：「不過啲朋友請吓一個，請吓又一個，冇辦法啦。」問楊生可會將「全副身家」送給太太做禮物？他笑說：「又唔得喎，要留番啲畀仔女。我都送咗好多嘢畀佢，總之我今次預咗個budget（預算），佢鍾意買咩就買咩。」楊太則笑稱仍在選購禮物，楊生補充：「佢送咗成個人畀我啦。」問他們有何相處之道？楊生說：「大家互讓互諒，楊太對我好好，好包容，對我好到冇得再好。我都準備咗啲說話一陣喺賓客面前講佢有幾好。」身旁的楊太被冧到全程笑得見牙唔見眼。

祖兒未有受訪，急步進入酒店。	軒仔沒有透露送甚麼賀禮。	毛玉萍注重健康，生活悠閒。

劉嘉玲合資送大禮

到場賀楊生楊太的賓客眾多，嘉玲透露和廿位朋友合資送了大禮給楊生。軒仔亦帶同賀禮現身，他表示：「係啲私人嘢，用得嘅。」又大讚楊生跟太太：「佢哋日日都咁sweet，淨係睇住佢哋都學到好多嘢。」林峯則和英皇高層吳雨差不多同步到場，問林峯送甚麼禮物賀老闆？身旁的吳雨抵死地說：「送廿年合約畀老闆囉。」令林峯一臉尷尬，場面搞笑。另外，近年較為低調的名媛毛玉萍亦有現身，她透露近年學懂健康是最重要，故現時生活較為悠閒。

文：音樂組