Bobby野外露鳥唔怕(目及)
藝人歐陽震華（Bobby）昨日宣傳新劇時當眾「強吻」萬綺雯（蚊蚊），嚇得她花容失色，Bobby更豪言不怕其老公陳十三！蚊蚊投訴Bobby再開黃腔，他卻無視蚊蚊還興奮自爆露械秘史！而王浩信就指收視若有33點會考慮露股，還建議黃心穎出新招冧觀眾：「倒立飲汽水。」
無綫新劇《東坡家事》一眾藝人歐陽震華、萬綺雯、王浩信、陳煒、黃心穎、李亞男、馬賽、湯洛雯等昨日出席記者會，會上Bobby當眾「強吻」蚊蚊，嚇得她即時縮後，場面搞笑。
倘高收允「裸泳」
及後受訪時，Bobby大言不慚的說不怕蚊蚊老公陳十三：「佢老公個個唔信都信我啦，信我唔夠膽。」蚊蚊即反駁：「但你成隻手掩住我，好似唔畀我講嘢咁！」問收視過33點會否考慮裸泳？Bobby說會奉陪到底：「但我落到海先除，唔會除咗先跳落去，到時再夾喺胳肋底。（夾咩話？）孖煙囪囉，夾條毛？咁就即係胳肋底毛！」考慮着比堅尼做啦啦隊的蚊蚊，即時投訴Bobby：「點解你講親嘢都變成三級，最尾都出唔到街。」
Bobby就懶理蚊蚊投訴，興奮地憶述試過在荒山野嶺小解，卻遇上旅遊巴駛近的「露械」秘聞：「我助手好醒目，用遮遮住我最重要嗰度，我就話唔好遮住我嗰度，遮住我個樣，嗰度豪畀佢。（問當眾『露械』係咪好刺激？）離佢哋好遠嘅。」
心穎倒立飲汽水
問及王浩信在影合照時，何不抱起心穎BB？他直指心穎磅數足：「佢骨重！之前有場戲講佢中毒要抱起佢，我都有做開運動，但佢嘅重量係我意料之外。」心穎坦言因北上外景時好食好住所致。對於收視若有33點，王浩信會否露三點？他說想參考台灣演員王大陸露股，心穎BB則說要諗新招，王浩信即提議：「佢倒立飲汽水！觀眾該會非常期待。」
文：影視組