林子祥夫婦捱眼瞓撐Alex

由林家棟監製、林德信（Alex）及J.Arie（雷琛瑜）主演的電影《死開啲啦》前晚在觀塘apm舉行首映，眾人台上玩鬥快飲汽水，Alex與J.Arie即場獻唱電影主題曲，Alex卻偷睇「貓紙」，相當搞笑！林子祥與太太葉蒨文罕有合體現身撐兒子Alex場，姍姍來遲的兩人從後門趕到戲院，引來一陣混亂，他們應傳媒要求跟Alex合照，但未有受訪。

爭取機會父子檔

對於獲父親捧場，Alex表示妹妹及親朋戚友都有到場：「我都係同大家第一次睇，好緊張，唔知好唔好睇，但到目前反應都幾好。（會問番爹哋意見？）我諗佢睇完即刻返去瞓覺，之後再問啦！（爹哋為你遲瞓？）係，佢好早瞓，佢問點解咁夜首映？」Alex又指會爭取機會跟父親合演電影，演甚麼也沒所謂。問到為何沒有請女友松岡李那睇首映？他說：「都想請，但今晚一個朋友都請唔到，遲啲請番。（可惜？）唔會，今晚係畀演員、支持我哋嘅投資者一齊嚟慶祝。」

Alex冇請松岡李那睇首映。	身為監製的林家棟（右二）亦有現身首映。	女主角J.Arie唔執輸，邀家人捧場。

J.Arie練講粗口

首次擔正的J.Arie表示非常緊張，感覺似放榜，並指父母已看優先場，大讚驚喜。提到片中有爆粗戲，她說：「呢句粗口對女仔嚟講幾爆，但代表咗九成香港人心聲。（平時講粗口？）少啲，好多時做音樂、同朋友講嘢都係friendly表現，冇攻擊性就得。（擔心父母睇到呢幕會尷尬？）佢哋知係劇情需要，有影評人話呢套戲冇廢話嘅對白，呢句有好大用處同意義。」她自爆為練這句對白似足黐線，在家中、乘坐交通工具甚至對玻璃倒影都會照練對白：「我放咗唔少時間練呢句粗口，點講得好聽啲，最後揀嗰一take都幾好聽。」

文：影視組