周嘉莉 陳嘉桓港女當自強

陳：陳嘉桓、周：周嘉莉

賺社會經驗

陳：我認識你係因為你主持《六合彩》，我有定期睇架！

周：師姐，我都識你好耐，只不過係你唔識我啫！

陳：唔好咁講啦，我都有客串過新春報道《六合彩》架，所以其實你係我師姐先真呀！主持方面要跟你學嘢，係呢，其實你當年點解參加亞姐嘅？

周：其實我都係想入娛圈發展嘅，好多人通常都係參加歌唱比賽入行，但我就揀咗選美，但完全冇諗過要拎獎項，純粹當係一個渠道。入行開始都好彩，工作都一個接一個，對自己係一個鍛煉，尤其主持《六合彩》，因為係直播，鍛煉到口才、反應同應變能力，因為冇得NG。我當然希望好似師姐你有咁好成績，有機會拍電影啦！

陳：加油呀！我細個其實有做模特兒，喺一次機緣巧合認識到老闆冼國林，佢問我有冇興趣學功夫，跟住就開始學，之後做埋演員咁囉！

周：我選美時廿一歲，剛完成大專課程，其實好多同學當時都仲讀緊書，我就選擇出嚟社會見識，比同期同學都係成熟嘅，但依家知道工作辛苦，都有諗過喺課本上再進修自己，但時間要配合到先得。

陳：我比你仲早入行，我十六歲已簽公司，完成會考就入行。但我覺得早入行係有幫助，比起同年紀嘅人成熟，社會經驗豐富咗、見識多咗，有時同同年紀朋友傾偈，都覺得自己行快咗。可以咁講，早出嚟社會工作，係學多咗課本上冇嘅嘢，呢行嚟講係得着。

周嘉莉自認典型港女，主張與另一半財政獨立。	陳嘉桓直言學功夫令異性卻步。	陳嘉桓（左）與周嘉莉早已投身娛樂圈，盼闖一番事業。

靚女唔實際

陳：嘉莉，你選美出身，其實你眼中點先叫做一個靚女？

周：如果圈中典型靚女，我會揀劉心悠。如果揀EQ高我就揀周秀娜，無論每次佢面對傳媒採訪都答得好大方，出道至今事業步步向上，負面新聞好少，又控制到場面，學到佢咁叻就好嘞！

陳：我覺得內在重要過外表，得個樣可能只會係花樽。所以EQ、修養都係好重要，要識得危機處理。可能我哋學功夫嘅，成日被人感覺好難埋身，好硬朗咁，加上我本身性格唔係超級女仔嗰啲，的確會令異性卻步嘅，不過感情嘅嘢我唔擔心。

周：好彩我身形比較嬌小，啲人想保護我多啲，所以異性抗拒程度相對比較低，都會有人追嘅。

陳：不過最好笑係，啲男性朋友話我講國語時特別溫柔，不過要做小鳥依人都要搵啱對象。嘉莉你有咩擇偶條件？

周：我鍾意高我唔多嘅人，高我少少就好嘞。師姐你咁高，一定要搵個再高啲嘅男仔做男友？

陳：其實唔係嘅，不過當然身高最好平頭啦！我比較喜歡運動型、充滿陽光氣息。我又唔係好慣對男仔撒嬌，因為好容易被人話係港女。

周嘉莉（左）以陳嘉桓為目標，盼有機會拍電影。	陳嘉桓由細到大都鍾意玩公仔。	周嘉莉自爆小時候最愛周街跑。

不單靠男人

周：我認係典型香港港女架，但唔係被標籤嗰隻港女囉！雖然我對金錢觀念好重，但係我主張嘅係個人金錢獨立，現今女性唔可以靠男人，女人要自力更生，自己賺到錢可以自己置業，唔使靠男友，唔通吓吓拍拖問人有冇樓喺手咩？

陳：「港女」其實代表香港女仔啫，一個夠地道嘅稱呼。其實所謂港女係講「性格」上嘅問題，一啲行徑同習慣令到男士們唔喜歡，因而被標籤咗呢啲行為做港女行為。好多人覺得港女好追求物質，但諗深一層香港經濟咁發達，社會令到大家追求物質上嘅要求高咗，又可歸咎於物價上漲問題。而資訊發達令大家接收新事物快咗，係一個社會大勢所趨。女仔要獨立，我以前有諗過25歲完成晒結婚生仔，但依家女仔真係要有個人事業，遲啲先啦。香港依家離婚率愈嚟愈高架，無個錢喺身唔得，女人唔好被人蝦。

周：我就諗過30歲先結婚，婚後都會要小朋友。不過以前年代男主外，女主內，相夫教子。依家發展到兩公婆都出去工作，所以女仔要自主。

男女大兜亂？

陳嘉桓練得一身好武功，她笑言很多朋友覺得她自小就很男仔頭，但她自言童年時相當溫柔，最喜愛玩公仔化妝扮靚：「啲親友都知我鍾意玩公仔，依家儲儲埋埋屋企仲有好多，依家有經濟能力都仲會買，細個會同啲公仔扮靚，幫佢哋換衫、剪頭髮，然後出街都會帶埋佢哋一齊去。」而周嘉莉則相反，直言由細到大都很男仔頭，喜歡同一班鄰居小朋友一齊周街跑，玩BB彈手槍。

文：影視組

場地：Chocolate Rain EAT & PLAY

服裝：Aameliestreet