呂晶晶撞瘀pat痛到失眠

呂晶晶日前於觀塘跟隨冼灝英師傅學拳，為新劇的索爆女特務角色作準備。自稱「零功夫」底子的晶晶表現相當落力，在冼師傅的嚴格指導下重複練習揮拳及踢腿動作，有板有眼。

周身傷痕 用遮瑕膏

晶晶說：「一星期至少練三次，每次兩個鐘。（咁勤力？）監製希望我少用替身。」頻頻受傷的她大爆撞瘀pat pat弄至痛極失眠：「有次我喺台上打拳，一時動作大到失平衡撞落地，真係超痛！半邊pat pat撞到瘀黑色，之後坐喺度都開始痛。瞓覺時痛到醒，連我媽都嚇親，惟有去刮痧推散瘀血。」毫不錫身的她手腳滿布瘀痕，故出活動時要狂用遮瑕膏：「腳就一定瘀，因為要踢沙包。腳趾會起水泡，仲會甩皮。出活動前要化妝師幫我周圍去遮手腳嘅瘀痕。」

呂晶晶每星期至少練三次拳，非常勤力。

在冼灝英指導下，呂晶晶打得有板有眼。

三點不露 極限裸背

晶晶拒做花瓶，更預告轉行型格性感路線：「以往返大陸拍劇都演公主同乖乖女。（今次拍劇好多動作戲，本身畏高？）一定要吊威吔，我唔怕高，笨豬跳一跳都跳三、四次。（想做性感打女？）都係，監製話啲戲服比較緊身，要騷到身體線條。（做奸角都得？）好想呀。（唔怕當街被人鬧？）咁即係肯定我演技。」但晶晶堅持三點不露：「唔會刻意除衫，三點都不露，裸背係極限喇。（浪費好身材。）露背都可以好靚。」有傳晶晶老闆諸葛紫岐患抑鬱而激瘦，晶晶說：「佢係瘦咗，但係屬於忙碌而有精神咁自然瘦。」

文：影視組

場地：大聖劈掛門（冼灝英師傅）

髮型：Tomas@K11 hair corner salon