吳若希中秋泛淚紙燈籠思親
今天中秋佳節，多位女藝人各自有過節方式，單身的張秀文大賣性感投入工作，莊端兒與鄧詠雪則走入廚房學做月餅，至於李美琪就以自製月餅行善。然而在這人月兩圓的日子，「女神」吳若希（Jinny）卻有另一番感受。年初經歷母親炒單車險送命的Jinny，更珍惜與家人共處的時間，自細由爺爺嫲嫲湊大的她，憶起當年家境貧窮仍獲兩老買紙燈籠滿足她時，不禁眼泛淚光，不過，經歷過坎坷日子的Jinny憑努力及堅持終捱出頭來。
「女神」吳若希本生於富裕家庭，可惜三、四歲時家人生意失敗令人生逆轉，曾住豪宅的她要「降呢」遷徙蝸居，Jinny講起坎坷往事時雙眼通紅，由爺爺嫲嫲湊大的她對於中秋節特別難忘：「有段時間屋企環境唔好，中秋節見同學玩電芯燈籠，我好羨慕，雖然屋企冇乜錢，但爺爺嫲嫲都買個紙燈籠畀我，依家諗起，反而最簡單嘅紙燈籠意義最大。」
母女險離別
十歲跟母親來港定居的Jinny透露，父母在弟弟出世後就離異，未試過一家四口齊齊整整食中秋節飯及影全家福，問會否遺憾？Jinny淡然說：「唔會，細佬未出世試過一家三口慶祝。」今年三月吳母因踩單車撞傷昏迷入院，當時忙於拍劇的Jinny放下工作日夜到醫院陪母親，為照顧病母又特別聘請工人。
Jinny承認經歷母女差點「離別」，學會珍惜身邊人，只要有時間都會陪至親：「細個冇咁重視節日，大個反而重視，藉呢啲日子同屋企人聚一聚都幾難得。」
撐起成頭家的Jinny坦言，母親出事時沒半句埋怨：「當時係好唔開心，但抱隨遇而安心態。（正能量天使？）唔係，所有嘢會諗最壞，因為有準備，當最壞事情發生就知道要做乜，覺得所有嘢可以應付同面對。」
顯強人本色
自稱現時單身的Jinny被問會否個性太強而嚇怕追求者？她說：「唔係話嚇怕，暫時冇呢個需要有個人喺側邊，因為乜都可以自己搞掂。」另外，Jinny昨日熱玩新App「17」，直播同細佬一齊畫畫的情況，又透露喉嚨還未好番，要去針灸。
文：音樂組
攝：吳文聰
場地：都會海逸酒店
服裝：Ava Fashion
髮型：Nick@O4
化妝：Lu