高調餵女友食扒羅孝勇：Relax咗

藝人羅孝勇（Sheldon）日前被《好報》獨家影到與32D索模女友夏意瑩（Jamie）高調開餐，更細心鋸牛扒兼逐啖餵。Sheldon昨日接受電話訪問，直認因年紀漸長而一改以往與舊愛林欣彤拍拖時的低調作風：「依家最重要工作先，但都會抽時間陪女友。（今次咁公開晒愛？）慣咗，以前喺澳洲一返嚟就入行，當時覺得（拍拖）好誇張。但人大咗，成熟咗就覺得好natural，感覺relax咗！（叫女友現身《2打6七七八八演唱會》支持？）係呀，畀咗飛佢，等佢同friend嚟。」