藝人心水

東網跟無綫合辦的《重播你有Say》近兩星期的投票相當熱烈,圈中不少藝人都有其心水票選劇集,其中兩套於票選中名列前茅的《男親女愛》和《義不容情》都受熱捧。

黃心穎

子華其實係我嘅(男神),佢嘅棟篤笑當時喺溫哥華上演時,我都有去撲飛,至於佢同嘟嘟,兩個有口才,鬥嘴時好大火花,如果拍續集就更好!而嘟嘟做司儀就好出色,但喺《男親女愛》劇中我都係第一次睇嘟嘟演戲,原來可以咁搞笑!

黃宗澤

我嘅心水劇係《男親女愛》,呢套劇係鄭裕玲(嘟嘟)、黃子華最有火花嘅劇集,尤其是我哋做演員,當年睇嘟嘟最佳拍檔係周潤發,以佢兩位前輩為練習演技對象,依家有子華同嘟嘟配搭,又有另一個驚喜,所以我睇呢個劇都好大得着!

黃美棋

《男親女愛》呢套劇有鄭裕玲、黃子華組合真係好吸引,大家對子華印象可能係棟篤笑,佢拍劇唔多,呢套劇出時帶出小強潮,子華同小強喺劇中做朋友,實際生活冇可能,所以呢套劇好特別,而佢兩個水溝油嘅人走埋一齊又好sweet,所以我好想睇番!

糖妹

我都好想《義不容情》可以重播,因為係26年前作品,當年我都係得2歲咋,要睇番呢套經典劇,真係好難得,又可以睇番黃日華好正氣嘅演技,又可以觀摩吓人人都話好奸嘅溫兆倫演得究竟有幾衰,仲有好靚嘅周海媚出道個樣!