麥浚龍耿耿十年延續癡戀
麥浚龍（Juno）用十年時間透過《耿耿於懷》、《念念不忘》到《羅生門》三部曲，將故事中那位「十年男孩」對前度的一廂情願徹底摧毀，這三部曲令廣東歌得到久違了的關注。Juno直言近年學會不跟市場走，那怕歌曲反應未如理想：「就算反應唔好，其實製作過程中我已經得到快樂。」相信能以快樂為前提製作唱片的，亦只有Juno。
今年七月麥浚龍和謝安琪合唱的《羅生門》派台後，立即大受歡迎，引來社交網絡和媒體洗版式的討論，連同《念念不忘》及十年前的舊作《耿耿於懷》，合組成故事中那位「十年男孩」的癡戀三部曲。
做音樂當甜品
Juno覺得一切都是緣：「之前喺黃偉文作品展，已經有傾過將《耿耿於懷》個故事延續，但當時我忙緊拍電影，之後要去好多影展，又開始寫第二個劇本，當時算係最大壓力嘅時候，嗰時做番音樂係甜品，於是開始諗個故事結構，決定用六首歌解構呢個男仔。」
結果Juno的計劃成功，新推出的EP《Addendum》亦令人期待，他說：「我開心係因為《羅生門》，令聽眾接觸到一個十年嘅故事回憶同延續，大家對廣東歌嘅熱情依然有，原來廣東歌都有質素同追看性。其實出嚟反應好，大家都開心，就算反應唔好，其實製作過程中我已經得到快樂。」
經歷時間考驗
有指當今香港樂壇，惟有Juno才有能力用十年時間打造這三部曲，他謂：「十年係有原因，如果《耿耿於懷》當年做完，即刻出《念念不忘》，其實未必有相同結果，亦說服唔到我。無經歷過一段時間點稱得上念念不忘？依家呢個安排係種緣分。」
文：曹家誠
攝：秦健輝
髮型：Sam Pan
化妝：Khaki
服裝：Song For The Mute、Comme Des Garcons、Acne Studio